Garantia Kréditu BSTL-SERVE Sei Estabelese SIE

0
89
Enkontru entre Governadór BSTL, Abraão de Vasconselos, Diretór Ezekutivu SERVE, Florêncio Sanches hamutuk ho ekipa tékniku BSTL nian ba implementasaun Eskema Garantia Kréditu iha Timor-Leste. Foto/BSTL.

DILI, (TATOLI)—Diretór Ezekutivu Servisu Rejistu no Verifikasaun Emprezariál (SERVE) Florêncio Sanches informa atu garantia kréditu ba dezenvilvimentu setór privadu Timor-Leste, iha fin tinan 2017 Banku Sentrál Timor-Leste (BSTL) no SERVE sei estabelese Sentru Informasaun Eskema (SIE).

“Iha ne’e SERVE mak envolve, IADE mós ha’u husu para bá ne’ebá ho ministériu relevante ne’ebé halai ba sira-nia área maibé sentru informasaun sei kria iha tempu badak nia laran,” Florêncio informa ba TATOLI bainhira hasoru malu iha Matadoru, foin lalais ne’e.

Polítika estabelesementu SIE atu responde nesisidade Dekretu Lei ne’ebé aprova ona hodi estabelese kritéria kréditu hodi setór privadu sira halo tuir.

“Ami tenta haka’as aan para prosesu hotu monu iha benefisiáriu sira-nia liman labele liu to’o loron 30. Ita kria sistema ida kontroladu maibé lalais labele halo sai kleur liu,” Florêncio esplika tan

Oras ne’e dadaun ekipa BSTL ho SERVE inklui ministériu relevante sira halo ona diskusaun kona-bá kritéria maibé ba ezistensia sentru no estabelesimentu sentru sei realiza tan enkotru ida tuir mai hodi diskuite.

Kritériu iha Sentru Informasaun ne’e mak sei tau tipu empreza haat iha SERVE nian no sai baze ba kriasaun sentru informasaun no sei mai ho kritériu no kategoria labele todan maibé rigorozu.

Dekretu lei Sistema Garantia Kréditu ba Empreza Ki’ik no Médiu Timor-oan sira Konsellu Ministru aprova iha loron 30 Maiu 2017, proposta hosi lei ne’e rasik submete hosi Ministru Estadu, Koordenadór ba Asuntu Ekonómiku no Primeiru-Ministru.

Tuir natureza dekretu lei konsidera sistema garantia kreditu hanesan programa públiku ne’ebe fó apoiu ba Empreza Ki’ik no Médiu Timor-oan sira, ho Sistema ne’e Estadu sei fó garantia ho másimu porsentu 70 ba empréstimu hirak ne’ebé konsede tiha ona, liuhusi rekizitu legál ne’ebé determina ona.

(Jornalista : Maria Auxiliadora, Editór : Manuel Pinto)

HUSIK IDA HATÁN