Garante Dezenvolvimentu Sustentavél Presiza Servisu Hamutuk

0
30
Programa ODS. Foto Google

DILI, (TATOLI) – Xefe Estadu, Francisco Guterres Lú Olo hatete partidu polítiku sira kuandu ukun presiza servisu hamutuk ho vontade tomak hodi garante dezenvolvimentu ne’ebé integradu no sustentavél ba jerasaun sira Timor-Leste nian.

“Ita sei tulun malu, servisu hamutuk ho vontade tomak atu hala’o dezenvolvimentu integradu no sustentavél ba jerasaun sira Timor-Leste nian”, hateten Prezidente Repúblika, Lú Olo iha debate partidu polítiku sira iha salaun Laline, Komisaun Nasionál Eleisaun, Kaikoli, ohin.

Nia hatutan, debate ParPol sei ko’alia kle’an no klaru, ho matenek no laran moos ba povu tomak liu-liu militante sira atu ida-idak hili tuir kompromisu programa ne’ebé fó sai ho hanoin atu hamenus kiak no hala’o dezenvolvimentu.

Parte seluk, Observadór Polítika Públika, Macario Sanches dehan tinan ne’e partidu polítiku hamutuk 21 mak hala’o hela kampaña polítika no sidadaun sira sei deside votu iha 22 jullu hodi hili nia membru parlamentu sira no bele forma governu mai husi maioria profesionál no koligasaun hodi dezenvolve Timor-Leste no ba povu nia moris di’ak.

Macario Sanhes

“Klaru katak debate ParPol importante mezmu iha diferénsia polítika no programa maibé kuandu ukun ona tenke lori estadu no povu  iha “vizaun ida, planu ida no asaun ida”, ba dezenvolvimentu nasionál ho intensaun atu enkoraja no forma pensamentu povu Timor-Leste, autor dezenvolvimentu sira, tantu iha setór públiku no mós privadu, inklui sosiedade sivíl sira, husi nivél nasionál to’o ba nivél lokál kona-bá oinsá bele kontribui ba Timor-Leste nia dezenvolvimentu”, hatutan.

Governu ne’ebé atu ukun tenke koñese no iha kompromisu forte hodi kaer metin no hala’o valór boa governasaun ho efikaz no koñese didiak implementasaun Planu Estratejiku Dezenvolvimentu Nasionál (PEDN) 2022-2030 ho vizaun ida, planu ida no asaun ida ba dezenvolvimentu.

“Públiku hotu-hotu, tantu polítiku, sosiadade sívil, sidadaun sira, dirijente sira inklui autoridade lokál sira mós presiza konñese implementasaun PEDN, nune’e bele transforma hanoin dezenvolvimentu ba povu hot-hotu”.

Nia hatutan tan, matenek nain sira  tenke sai ona agente transformador, inisiadór, vizionér no lalika hein ema seluk hahu depois ita kritika, karater ne’e presiza halakon ona. Presiza iha ona mudansa ba karater dezenvolvimentu nian ne’ebé “matenek nain sira” tenke iha vizaun ida, planu ida no asaun ida ba kualker área espesialidade ne’ebé sira pertense ba hodi ikus mai bele kontribui ba dezenvolvimentu nasionál.

Jornalista: Zezito Silva

Editora: Rita Almeida

HUSIK IDA HATÁN