GAI Fa’an Ona Hare Tonelada 143

0
54
Foto google

DILI, (TATOLI) – Grupu Agrikultór Integradu (GIA) ne’ebé estabelese husi Ministériu Agrikultura no Peska (MAP), konsege ona fa’an hare tonelada 143 mil kilograma no hetan osan U$57.200 mil iha tinan 2016.

Diretór Nasionál Agrikultura, Ortikultura no Estensaun, MAP, Amaro Ximenes.

Diretór Nasionál Agrikultura, Ortikultura no Estensaun, MAP, Amaro Ximenes informa GAI sira ne’e iha Suai konsege fa’an tonelada 60 , Karaulun tonelada 80, Kasa no Bonuk fa’an kuaze tonelada 23, Oebaba tonelada 50 ne’ebé servisu hamutuk entre MAP ho grupu sira ne’e no Raibere lakonsege fa’an tanba dook no iha área rurál nune’e kompañia lakonsege tama bá fatin ne’e.

“Orsamaentu ne’ebé hetan ne’e ba natar no to’os na’in nian, Governu fasilita de’it sira ho parte tékniku, materiál agrikultura hanesan tratór boot, mina fila rai gratuitu, pestisida no adubu”, hatete Amaro ba TATOLI iha Komoro, ohin

Diretór ne’e esplika, tanba orsamentu ne’ebé aprova husi Parlamentu Nasionál nian ho objetivu atu dezenvolve agrikultór sira, nune’e MAP fasilita no laiha osan ne’ebé mai fali kofre Estadu maibé hanesan subsídu ne’ebé Governu fó ba grupu sira ne’e.

GAI estabalese ona no servisu ho komponente barak, liuliu relasaun ho agrikultura hanesan iha grupu ne’ebé kuda hare, entre sira prodús mós adubu orgánika, hala’o serbisu iha irrigasaun, ortikultura, no pekuária nian.

“Agora daudaun ami hanoin hela atu halai ba peska katak bee ne’ebé iha natar laran, nia kuandu suli to’o iha natar nia rohan bainhira tama tiha mota-laran ou tasi-laran di’ak liu ita halo penampungan ida sai hanesan bee nalihun hodi nune’e bele haki’ak ikan iha laran liuliu ba sira ne’ebé dook husi tasi para bele asesu ba ikan, ida ne’e mak ita bolu integradu”.

Grupu Agrikultór sira ne’e MAP mós fó treinamentu ka fasilita sira iha parte tékniku iha área sira ne’e bainhira prodús nia produtividade ai-horis labele sa’e  enkuantu lahetan suplementu ruma hanesan adubu.

“Adubu iha oin rua iha kímiku no orgániku, ami sujere liu orgániku ba sira tanba primeiru ita prodús ai-han ne’ebé saudavel, ita prodús adubu rasik nune’e grupu sira lapresiza hasai orsamaentu atubele sosa adubu kímiku depois oinsá mak ita-nia rai ne’e livre husi kímiku”.

Grupu agrikultór sira ne’e MAP liga sira diretamente ba merkadu hanesan iha parte Maliana liga ba kompañia boot iha ne’ebá, iha rai-klaran aloka ba iha Ministériu Komérsiu Indústria no Ambiente (MKIA), parte Leste nian servisu hamutuk MKIA ho kompañia Acelda iha Baukau ne’ebé prodús ona foos durante ne’e no sosa hare iha fatin-fatin.

Jornalista: Maria Auxiliadora

Editora: Rita Almeida

HUSIK IDA HATÁN