Fulan Ida Operasaun Tránzitu Hetan Reseitas US$ 51.367

0
197
Diretór Tránzitu Nasional, Inspektor Xefi António Soares. Foto Ajensia Tatoli: Julia Chatarina

DILI (TATOLI)—Diretór Tránzitu Nasionál, Inspektór Xefi António Soares relata, durante operasaun tránzitu iha fulan ida (Juñu) hodi halo fiskalizasaun ba dokumentus no asessórius kareta no motor, Polísia Tránzitu hetan reseitas hamutuk US$ 51.367 husi husi ema nain 1571, ne’ebé selu ona iha Banku-BNU.

“Husi totál ema ne’ebé halo infrasaun tránzitu, ema ida bele halo rua ka tolu infrasaun, bainhira aplika ona koimas infrasaun ba infrator, nia simu nota no ba selu iha Banku Nasionál Ultramarinu (BNU) hafoin hato’o ba Polísia Tránzitu no justifika selu ona mak bele fó fali kareta ka motor,”  Diretór Tránzitu Nasional, Inspektór Xefi António Soares ba Ajensia TATOLI iha nia k’nar fatin Kaikoli, Kinta (13/7).

Nia dehan infratór nain 1.571, kompostu husi kareta governu 1, motor governu 20, kareta privadu 58, motor privadu 1312, transpórte públiku iha 180.

Operasaun tánzitu ne’e ho objektivu atu fiskalizasaun dokumentus no asesores kareta no motor inklusivamente ba armas brankas, bazeia ba ordem diretiva husi komando jerál ba 13 munisípiu atu hala’o operasaun relasiona ba kampaña eleitoral.

Operasaun sei kontinua halo loron-loron iha loron no kalan durante kampaña eleitoral no eleisaun, hahú loron 20 juñu to’o eleisaun 22 jullu no sei remata servisu operasaun fiskalizasaun ne’e hafoin konsentra fali iha seguransa ba sentru votasaun sira.

Biar nune’e, hafoin aktividade eleisaun nia ramata servisu polísia tranzitu sei la’o nafatin hanesan fiskalizasaun konjuntu ho Diresaun Patrimóniu Estadu, Diresaun Nasionál Transpórte Terestres (DNTT), hodi halo fiskalizasaun ba viatura estadu ne’ebé tau xapa matríkula la tuir legalidade, liu-liu kareta governu.

(Jornalista: Julia Chatarina, Editór : Manuel Pinto)

HUSIK IDA HATÁN