FRETILIN Seidauk Aprosima Partidu Seluk Ba Formasaun Governu

0
488
Sekretariu Jerál partidu FRETILIN, Marí Alkatiri ko'alia ho jornalista sira hafoin enkontru ho Prezidente Repúblika, Francisco Guterres Lú Olo iha Palásiu Prezidensiál, ohin. Foto Tatoli/Xisto Freitas

DILI, (TATOLI) – Sekretáriu Jerál Partidu Frente Revolusionariu Timor-Leste Indepéndente (FRETILIN), Marí Alkatiri hateten to’o ohin loron FRETILIN seidauk aprosima partidu sira seluk ne’ebé hetan asentu iha Parlamentu Nasionál atu forma governu tanba rezultadu eleisaun parlamentár seidauk difinitiva.

Tanba ne’e, Marí informa, FRETILIN seidauk bele ko’alia kona-ba formasaun governu. “Seidauk to’o tempu ko’alia kona-ba formasaun governu tanba Komisaun Nasionál Eleisaun sei halo apuramentu nasionál. Formasaun Governu akontese hafoin anúnsiu ofisiál hosi Tribunál Rekursu”, Marí ko’alia asuntu ne’e ba jornalista sira iha Palásiu Prezidénsia Repúblika, Bairu Pité, kuarta ne’e, hafoin enkontru ho Prezidente Repúblika, Francisco Guterres Lú-Olo.

Maske nune’e, nia haktuir, dezde kampaña parlamentár ko’alia beibeik ona katak partidu hotu-hotu tenke serbisu hamutuk atu lori Timor ba Nasaun ida buras liu.

“FRETILIN deklara bebeik ona katak FRETILIN sei la-ukun mesak. Ami kostuma dehan FRETILIN manán, Xanana manán no povu tomak manán”, afirma.

Objetivu sorumutu ho Xefe Estadu, Marí tenik, ko’alia kona-ba oinsá kria klima konfiansa entre lideransa partidu hotu-hotu para serbisu hamutuk atu haburas demokrasia no lori dezenvolvimentu.

Hafoin enkontru ho líder FRETILIN, Xefi Estadu kontinua simu vízita hosi Sekretáriu Jerál Partidu CNRT, Francisco Kalbuadi Lay no sei enkontru mós ho Prezidente Partidu Libertasaun Populár (PLP), Taur Matan Ruak, orsida tuku 15.00.

Jornalista: Xisto Freitas

Editora: Rita Almeida

HUSIK IDA HATÁN