DILI (TATOLI)-Prezidente Federasaun Kooperativa Kréditu Hanai Malu, Elizario Ferreira informa federasaun halibur ona osan serkade millaun U$5 ho nia membru kooperativa hamutuk 90.
“Kuandu ami hahú iha 2010 ne’e laiha osan, agora serkade millaun U$5 mak halibur iha ne’e ho nia membru kooperativa 90 ne’e, 47 membru regulár halibur ema rihun 18 hanesan membru ba iha kada kooperativa no husi rihun 18 iha tinan 2016 ne’e fasilita empréstimu, bolu credit long ne’e ba ema rihun 12 iha Timór,” Elizario dehan iha Aitarak-Laran, ohin.
Empréstimu ne’ebé Kooperativa Kréditu Hanai Malu sei fó ba membru sira kategoriza ba kategoria tolu mak empréstimu ba produtivu, bem estra no emerjénsia.
Empréstimu ba produtivu ne’e katak nia empresta osan atu loke kios, alfaiate, karpintaria, taka roda, soldadura bazeia ba talentu ne’ebé membru ne’e iha.
Empréstimu sira ba bem estar ne’e atu kompleta nesesidade família nian hanesan sira ne’ebé funsionáriu bele hola sira-nia oan nia bisikleta, motór no seluk tan depois to’o fulan mak sira repoen empréstimu ne’e ba kooperativa.
Benifisiu sai membru ba kooperativa Kréditu Hanai Malu mak membru hetan edukasaun jere nia osan no buka osan, gasta osan no devolve osan.
Entertantu empréstimu emerjénsia ne’e nia tipu ba emerjénsia duni, ezemplu membru ida halo hela negósiu maibé derrepende nia oan monu kanek, bele ba kooperativa tanba iha direitu atu hetan empréstimu ne’e atubele halo tratamentu ba nia oan nia saúde ou lia ruma ne’ebé emerjénsia.
Oras ne’e dadaun kooperativa Kréditu Hanai Malu fó ona empréstimu ba ema rihun 12 ne’ebé no kria kampu traballu diretu ba ema rihun 25 husi ema rihun 25 prodús efeitu benefísiu indiretu ba família, ema kuaze rihun 150 mak hetan benfísiu husi kooperativa fó ba sira.
Entaun ema rihun 12 mak benefisiadu husi kréditu ne’e. Husi ema ne’ebé benefisiadu kooperativa mós fó kampu traballu, hahú husi federasaun ba to’o iha kooperativa 47 ne’e, kria ona kampu traballu ba ema 882 hanesan funsionáriu ne’ebé iha kategoria tolu mak jerente, xefe divizaun sira no seluk tan.
Elizario konta katak, “Federsaun Hanai Malu” foufoun estabele iha loron 24 Abríl 1996 ne’ebé hamahan-aan iha Organizasaun Naun Governamentál ida iha tempu Indonézia. Hafoin ukun-aan federasaun ne’e hamriik mesak no iha tinan 2000 to’o 2010 labele la’o tanba nia dirijente sira hala’o serbisu iha fatin seluk no iha 2011 mak hahú fali atividade.
Bainhira federasaun ne’e restaura fali nia ezisténsia, hahú husi kréditu de’it liuhusi kooperativa 29 iha loron 13-14 Novembru 2010 no presiza tempu fulan neen atu harii fali nia estrutura no funsionamentu no hahú loloos iha Jullu 2011 no kooperativa sira foin komesa investe osan no halo formasaun ba kooperativa iha nivel baze, eduka populasaun atu harii kooperativa.
Tanba ne’e agora daudaun iha kooperativa kréditu 90 iha Timor-Leste no husi ne’e 47 mak membru regulár no 47 hanesan kandidatu membru ne’ebé mak sei hetan akompañamentu no supervizaun husi federasaun rasik.
(Jornalista : Maria Auxiliadora)
(Editór : Manuel Pinto)
