ETO Prienxe Kritéria ba Infraestrutura Armazenamentu Kombustivel

0
111

DILI, (TATOLI) – Prezidente Autoridade Nasionál Petróleu no Minerál (ANPM), Gualdino da Silva hatete kompañia nasionál Esperansa Timor Oan (ETO) prinxe ona kritéria ba operasaun instalasaun no infraestrutura armazenamentu kombustivel tuir padraun ANPM no globál nian.

ANPM utiliza padraun  prátika indústria ne’ebé hanaran NFP no API nian ne’ebé iha mundu indústria petrolíferu uza liuliu iha indústria armazenamentu atu haree kona-ba dezeñu, espesifikasaun téknika husi materiál sira ne’ebé mak atu uza no hatene mós kona-ba sistema protesaun ba inséndiu.

“Sira atu dezeñu tanki karik nia mahar no volume oinsá no ANPM adota de’it espesifikasaun ne’ebé mak adotada ona iha mundu no sai hanesan standar iha rejiaun, tanba ne’e mak ita-nia regulamentu iha em termos espesifikasaun sira ne’e ita laestabelese ita-nian, ita adota sira entaun fasilidade sira ne’ebé mak harii ne’e la’ós de’it prienxe kritéria lokál maibé kritéria ne’ebé ema iha país seluk uza, ita-nia standar ne’e laremota ida, standar globál”, dehan Gualdino iha Faról, ohin.

Aleinde ne’e kritéria seluk mós ba dahuluk haree ba fatin estabelesimentu armazenamentu ne’ebé hetan pareserer husi terras no propriedade, pareser mós husi ministériu kompetente kona-ba lisensa ambientál nian hafoin ba dezeña no detalle sobre fasilidade rasik ne’ebé inkorpora ona ho fasildade jetty atu hatún nian.

“ANPM haree liu iha prosesu instalasaun dezeñu tékniku ba tanki ne’ebé haree kona-ba pipa ka kadora sira ne’ebé uza, depois haree iha nia sistema fire protection ne’e iha potensialidade atu ahi-han ne’e ita-nia protesaun saida mak iha ne’ebá, medida protesaun saida mak sira iha, ida ne’e mak ANPM haree durante ne’e”.

Ida ne’e hanesan esperiénsia dahuluk ANPM nian no envolve mós konsultan na’in-rua husi Inglaterra ne’ebé haree ba dezeñu tanki nian no halo inspesaun hamutuk ho ANPM no diskute bazeia ba regulamentu ne’ebé iha ona no prevé ona iha padraun saida mak tenke tuir”.

Artibuisaun lisensa operasaun ba instalasaun no operasaun infraestrutura ne’ebé ANPM emite ba Kompañia ETO ne’e liuhusi prosesu lubuk ida hafoin bele hahú operasaun tanba kritériu mínimu prienxe hotu ona no sei iha kritériu neen ka hitu hanesan ne’e, ne’ebé ETO tenke prienxe no sei fó tempu fulan tolu atu hatama fali lista no lisensa durante tinan lima ne’e saida mak tenke hadi’a no bele adere ona porsentu 100 ba regulamentu  ne’ebé iha.

“Konstrusaun ne’e hahú tiha ona antes ita-nia regulamentu ne’e iha, lei fó dalan mai ita para sira bele hahú maibé fó mós tempu ba sira atu bele prienxe kritéria sira ne’e hahú husi agora to’o 2023 ne’e sira aprezenta planu, iha três mêses sira tenke aprezenta item sira ne’ebé mak ami identifika ona ne’e bainhira mak sira atu halo, entaun monitorizasaun sei la’o atu asegura katak iha loron ikus sira bele tuir hotu ona kritériu”.

Diretór Ezekutivu ETO, Nilton Telmo Gusmão dos Santos  hatete ho tempu ne’ebé ANPM fó, kompañia sei hadi’a beibeik durante tinan lima atu nune’e investimentu iha Hera ne’e seguru nafatin.

“Tanba ita hetan tiha lisensa ohin depois aban ita abandona ona, lakohi fó atensaun ba investimentu entaun ita bele fó risku filafali, tanba ne’e ANPM nia regulamentu klaru, sira kontinua fó asisténsia no tau matan sé ami lakumpri regra operasaun indústria ida ne’e nian ANPM sei hapara ami-nia atividade, tanba ne’e ami komprimitidu halo tuir regra hotu depois bele presta servisu ne’ebé mak ho kualidade liu”.

Jornalista: Maria Auxiliadora

Editora: Rita Almeida

HUSIK IDA HATÁN