Estudante 22 Simu Bolsa Taur Matan Ruak

0
140
Lista bolseiru sira. Foto: Sentru Queshadip Ruak

DILI, (TATOLI) – Sentru Queshadip Ruak, ohin, entrega tan sertifikadu programa bolsa estudu Taur Matan Ruak ba estudante na’in 22 ne’ebé mai husi família karensiada, vulnerável no desfavoresida. Serimonia ne’e hala’o iha Auditóriu Arkivu no Múzeu Rezisténsia Timor-Leste (AMRT).

Reprezentante Sentru Queshadip Ruak, Miguel Maia hateten bolsa estudu ba veteranu no kombatente nasionál nia oan, bolsa da mãe, barak ba estuda iha estranjeiru, menus estuda iha rai laran.

Estudante balun, falta apoiu husi família no asaun sosiál sira, dalabarak halo estudante sira buka serbisu ba aan rasik nune’e fahe tiha tempu husi estuda nian ba serbisu.

“Investimentu ba família kbiit laek sira sei enkoraja no sai komportamentu ezemplár ba sira-nia estudu rasik”, hateten Miguel Maia.

Reprezentante ne’e mós hatutan sente onradu ho apoiu ne’ebé mai husi eis-prezidente Taur Matan Ruak tanba bele sai bee matan ida hodi sulin netik ba família karensiada, vulnerável no desfavoresida sira, nune’e bele fó buras, sai nu’udar ai-huun ida hodi bele fó fuan iha futuru.

“Tanba ne’e enkoraja estudante sira atu estuda, bainhira hetan rezultadu di’ak ita kontente. Nune’e, bele sai mós sujeitu hodi buka tan apoiu”, Miguel Maia enkoraja benefesiáriu bolsa Taur Matan Ruak.

Hatutan tan, bainhira estuda, iha isin. Estuda hahú ki’ik, ikus sai boot. Bainhira estuda, sei hakarak nafatin estuda, tan hetan nafatin buat foun. “Estudante ida susesu sai xave ida ba família, hodi ajuda família seluk”.

Bolseira Josefina da Costa de Jesus agradese ba apoiu ne’e tanba bele ona ajuda nia durante prosesu estudu.

“Fulan ida ami hetan dolár 95, to’o eskola remata. Ida ne’e ajuda ona ha’u, agradese tebes”, espresa bolseira husi Universidade Nasionál Timor Lorosa’e (UNTL) ne’e.

Entretantu, atribuisaun bolsa ne’e refere ba kandidatu bolsa ne’ebé mai husi família kbiit laek, la iha asesu ruma ba rendimentu hanesan saláriu, subsídiu, pensaun ka apoiu husi estadu ka entidade seluk hodi sira hetan difikuldade iha kontinuasaun ka konkluzaun ba sira-nia estudu.

Sertifikadu bolsa ne’e entrega direta husi eis-prezidente Taur Matan Ruak no asiste direta husi reitór UNTL, Francisco Miguel Martins, autoridade relizioja, sosiál nomós inan-aman sira.

Antes ne’e, Sentru Queshadip Ruak entrega mós sertifikadu programa bolsa estudu Taur Matan Ruak ba estudante na’in 26 husi situasaun família ne’ebé hanesan.

Jornalista: Rafy Belo

Editora: Rita Almeida

HUSIK IDA HATÁN