ENIN Hamutuk 7214 Rejistadu Iha SERVE

0
54
Foto/SERVE.

DILI, (TATOLI)- Supervizora Seniór Servisu Rejistu no Verifikasaun Emprezariál (SERVE), Ana Jeánnie Alexandra de Corte-Real informa númeru husi tipu kompañia ne’ebé rejista barak liu hahú tinan 2013 to’o Marsu 2017 iha SERVE mak Empresário em Nome Individual (ENIN) ho totál hamutuk 7214.

“Tendénsia ema barak halo rejistu iha tipu ida ne’e tanba depende ba ema ida-idak nian desizaun, preferénsia no posibilidade ekonómika,” Alexandra de Corte-Real informa bainhira hasoru malu iha Matadouru foin lalais ne’e.

Tuir Ana SERVE nia funsaun no natureza atu halo rejistu komersiál no fó informasaun ne’ebé mak lei haruka no SERVE lahalo desizaun ida ba ema ne’ebé hakarak harii nia kompañia.

Se Kompaña ida ho tipu ENIN sente katak ida ne’e natoon ba nia-an de’it, nia halo kompañia ne’e ho tipu Unipessoal,Lda mas sé nia hakarak atu asosia tan ho ema seluk nia bele halo nia tipu kompañia ne’e ho LDA para bele iha forsa tan. SERVE prontu iha kualkér momentu kuandu iha emprezáriu ka negosiante mai husu informasaun tanba sira-nia falta koñesimentu kona-bá servisu, SERVE sempre prontu atubele fó informasaun, orienta sira maibé desizaun sempre iha sira-nia liman no sira mak deside.

Daudaun ne’e SERVE rejistu ona kompaña hosi tinan 2013 to’o Marsu 2017 kompañia iha tipu UNIPESSOAL, LDA. (Sociedade Unipessoal por Quotas Limilita) hamutuk 6823, LDA (Sociedade por Quotas Limitada) iha 2936, S.A (Socieadade Anônima) 51, E. P (Empresa Pública) 3 no R.P (Representação Pública) iha 83. Totál empreza sira ne’ebé rejista en jerál hamutuk 17110.

(Jornalista : Maria Auxiliadora, Editór : Manuel Pinto)

HUSIK IDA HATÁN