Emposadu 23 Husi PCM Sertifika Aan Bazeia Konkursu Eletróniku

0
54
Foto hamutuk depois simu tomada pose. Foto Tatoli/António Goncalves

DILI, (TATOLI) – Emposadu 23 husi Prezidénsia Konsellu Ministru (PCM-sigla iha portugés) simu ona pose ba kargu diresaun no xefia husi Prezidente Funsaun Públika. Emposadu sira ne’e sertifika-aan liuhusi prosesu selesaun pur méritu no bazea ba konkursu eletróniku.

Prezidente Komisaun Funsaun Públika (KFP), Faustino Cardoso hatete antes ne’e KFP uza sistema manuál ne’ebe dalabarak hetan intervensaun oioin no potensiál ba korrupsaun, koluzaun no nepotizmu (KKN) maibé konkursu eletróniku ne’e konsege hadook potensialidade ne’e.

“Asegura di’ak liután dignidade profisionál ne’ebé mak emposadu sira ida-idak sertifika aan no hatudu liuhusi prosesu ida ne’e. Ita iha avansu tanba termu aseitasaun ida ne’e ba períodu tinan haat, uluk tinan rua”, Faustino informa iha Delta Nova, ohin, iha serimónia toma pose ba kargu diresaun no xefia PCM nian.

Entantu Timor-Leste sei halo eleisaun no tempu badak sei iha Governu foun no bele mós iha mudansa ba elenku (membru) governantes, estrutura administrasaun públika ne’ebé bele implika ba mundansa ba etrutura sira ne’ebé mak iha.

Emposadu hirak ne’e simu kargu ba períodu tinan haat nian maibé Dekretu Lei 25/2016 define situasaun sesasaun ba kargu rua mak sirkunstánsia automátika no eventuál.

“Ida eventuál ne’e governu foun mai dehan iha re-estruturasaun, halo departamentu ida ne’e, ida ne’ebá, tanba ne’e mak sesasaun eventuál tenke prontu hasoru sirkunstánsia ne’e. Komisaun Funsaun Públika nia papél bainhira Governu foun mai karik ami buka aproximasaun atu asegura respeitu másimu ba termu kargu tuir Dekretu Lei define”.

Faustino alerta ba emposadu sira atu asegura valór sira iha termu asetasaun sobre ijensaun, dedikasaun, responsabilidade no produtividade tanba importante tebes.

Sekretáriu Estadu Konsellu Ministru, Avelino Coelho hatete ba emposadu sira atu fó atendimentu públiku ne’ebé korrespondente ba kapasidade no knaar ne’ebé simu ona.

Jornalista: Maria Auxiliadora

Editora: Rita Almeida

HUSIK IDA HATÁN