Embaixadór Indonézia Espera Demokrasia TL La’o Seguru

0
80
Embaixadór Indonézia ba Timor-Leste, Sahat Sitorus hasoru malu ho Primeiru Ministru, Rui Maria de Araújo iha Palásiu Governu, ohin. Foto mídia GPM

DILI, (TATOLI) – Embaixadór Indonézia iha Timor-Leste, Sahat Sitorus iha esperansa atu eleisaun Timor-Leste (TL) la’o ho estabilidade tanba lian povu hanesan lian husi Maromak.“Ami iha esperansa atu eleisaun la’o ho estabilidade tanba ida ne’e hanesan lian husi povu, lian povu hanesan lian husi Maromak”, tenik ba jornalista sira iha Palásiu Governu hafoin hasoru malu ho Primeiru Ministru (PM), Rui Maria de Araújo, kinta (20/7).

Hodi dehan tan, espera demokrasia iha TL bele la’o ho seguru no laiha problema atu bele forma governu foun ne’ebé forte, mantein servisu hamutuk ne’ebé di’ak, sekuandu iha koligasaun, koligasaun ne’ebé di’ak atu kontinua dezenvolve infraestrutura.

Enkontru ne’e, Sahat Sitorus informa katak hasoru ona Prezidente Lú Olo no hato’o ona kartaun kredensiál husi Prezidente Indonézia, Jokowi katak nia hetan fiar atu sai embaixadór iha TL.

Nia mós agradese bele hasoru ho xefe governu no hato’o mós komprimentus husi Prezidente Jokowi no Ministra Negósiu Estranjeiru Indonézia, Retno Marsudi.

Indonézia mós hakarak TL ba oin hodi mantein seguransa rejionál hamutuk no hein suporta husi governu foun TL hadi’a problema kiik sira ne’ebé sei difikulta entre nasaun rua.

“Ami mós hakarak atu Timor-Leste bele sai membru ASEAN, Indonézia  sempre suporta, atu povu bele goja (menikmati) bainhira ASEAN hetan susessu”, katak tan.

Entretantu, iha loron 13 marsu tinan ne’e, Sahat Sitorus hetan posse husi Prezidente Jokowi nu’udar embaixadór Indonézia iha TL hamutuk ho 17 embaixadór seluk.

Jornalista: Julia Chatarina

Editora: Rita Almeida

HUSIK IDA HATÁN