Eleisaun Ho Dame ANFREL Kongratula TL

0
75
Logotipu ANFREL

DILI (TATOLI)- ANFREL (Asian Network for Free Elections) kongratula povu Timor-Leste (TL) tanba susesu realiza eleisaun lejislativa iha tinan ne’e ho di’ak no nakonu ho dame. Susesu husi eleisaun ne’e atribui ba komprímisu hodi hametin dame no kooperasaun entre organizasaun sira.

“Partidu polítiku, forsa seguransa, sosiedade sívil no parte jestór eleisaun nian hanesan CNE (Comissão Nacional das Eleições) no STAE (Secretariado Técnico da Administração Eleitoral),” haktuir komunikadu ANFREL nian, ohin.

Eleisaun lejislativa, 22 jullu tinan ne’e, la’o iha ambiente eleitorál ne’ebé hakmatek no sasin husi observadór internasionál sira, hahú abertura kampaña partidu polítiku sira to’o iha data ofisiál ba realizasaun festa demokrasia.

“Iha périodu pré-eleisaun la iha kazu violénsia no intimidasaun no iha ambiente ne’ebé kondusivu tanba iha ambiente kampaña ne’ebé nakonu ho dame, ne’ebé autoriza mós kandidatu sira hodi partisipa no hala’o sira-nia atividade ho livre,” relata tan ANFREL iha komunikadu ne’e.

Nune’e mós, tuir ANFREL, iha périodu eleisaun, mezmu iha insidente ki’ikoan balun maibé la fó impaktu signifikante ba kredibilidade eleisaun nian, ne’ebé organiza rasik husi governu no estadu Timor-Leste kompara ho eleisaun sira antes ne’ebé hetan apoiu tékniku no administrativu husi Organizasaun Nasaun Unida (ONU).

Misaun ida ne’e nota nu’udar melloramentu ne’ebé ekstraordináriu tebes maibé iha lakuna balun ne’ebé presiza hadi’a di’ak liutan hodi fó serteza espesífika ba iha fundu kampaña nian.

Administrasaun eleitorál bele reforsa liutan liuhusi implementasaun regra no prosedura ne’ebé uniforme ba eleisaun. Kontajen votu bele mós habadak sein sakrfika ninia transparánsia.

Indikadór Díli ba eleisaun demokrátiku, ANFREL nu’udar instrumentu prinsipál hodi avalia eleisaun, ne’ebé inisia husi Timor-Leste.

“Tanba ne’e, ami husu parseiru sira atu hatuur matadalan prinsípiu ne’ebé iha. Misaun ANFREL mak lansa avaliasaun hafoin termina prosesu rezolusaun disputa eleitorál,” refere tan komunikadu nee hodi konklui.

Antes ne’e, Prezidente Repúblika Francisco Guterres, Lú-Olo saúda, ANFREL, rede aziátika ba eleisaun livre tanba komemora nia aniversáriu ba dala rua nolu, iha ne’ebé nu’udar mós momentu espesiál id aba Timor-Leste tanba hala’o nia eleisaun lejislativa hodi forma sétimu governu, hodi ukun iha périodu 2017-2022.

“Hato’o ha’u-nia felisitasaun ba doutór Dâmaso Magbual, membru no ativista ANFREL. 2017, rede promotora transparánsia iha prosesu eleitorál ne’e komemora nia aniversáriu ba dala rua nolu,” xefe estadu felisita rede ne’e.

Entretantu, ANFREL, rede aziátika ba eleisaun livre ne’e harii iha november 1997 no hahú nia ezisténsia rede ne’e hala’o ona nia operasaun iha nasaun ázia sira.

Informasaun relevante, asesu iha link ne’e :http://anfrel.org/anfrel-press-release-on-the-conduct-of-the-2017-timor-leste-elections/

(Jornalista: Rafy Belo)

(Editór : Manuel Pinto)

HUSIK IDA HATÁN