DILI, (TATOLI) – Diretór Nasionál Agrikultura, Ortikultura no Estensaun, Ministériu Agrikultura no Peska (MAP), Amaro Ximenes informa ekipamentu agrikultura iha kontentór 19 ne’ebé hetan doasaun husi Xina no apreende (foti) husi Alfándega ne’e ho objetivu atu aloka ba irrigasaun neen ne’ebé MAP estabelese ona.
Irrigasaun hirak ne’e mak Oebaba (Zumalai), Karaulu (Same), Raibere (Ainaro), Bonuk (Hatu-Udo), Bulutu (Laleia) no Kasa (Ainaro) nomós materiál sira ne’e atu fasilita mós peskiza batar iha eskola Natarbora nian. Sasán sira iha kontentór ne’e mak mákina baku hare, dulas hare, tratór liman fila rai nian, no materiál seluk tan.
Iha loron sesta (14/7) semana kotuk, bazeia ba dekretu lei númeru 11/2004, artigu 63, kuandu sasán sira ne’ebé tama iha Portu Dili liu ona loron 90, automátikamente afavór ba Estadu, nune’e Alfándega apreende materiál sira ne’e tanba MAP seidauk konsege selu kontentór ne’e no parte kompetente iha obrigasaun atu hatene ekipamentu saida mak iha laran, nune’e iha loron ne’e kedan loke kontentór ne’ebé nakonu ho sasán agríkola nian ho manifestu ba Diresaun Nasionál Agrikultura, Ortikultura no Estensaun tanba kontentór sira ne’e iha portu fulan-ualu ona.
Amaro esplika MAP iha orsamentu 2016 ne’ebé aloka atu selu kontentór 19 ne’e maibé tanba iha dívida ministériu nian atu selu kotentór fini hare íbrida ne’ebé mai husi Xina entaun osan ne’e laselu fali ba kontentór 19 ne’e.
“Signifika orsamentu 2016 atu selu kontentór ne’e labele ona, hafoin ami tau fali planu asaun anuál 2017 mós ami lakonsege tau osan maibé iha tinan 2017 ami transfere osan U$187 mil ne’ebé atu selu kontentór 19 ne’e ho nia demorate sira hotu”, hatete nia, ohin iha ninia servisu fatin.
Maibé sobre tranferénsia osan tuir lei haruka tenke hetan aseitasaun husi Unidade de Planeamento, Monitorização e Avaliação (UPMA) iha Gabinete Primeiru-Ministru no prosesu ne’e mak tenke demora tempu uitoan no husi UPMA estuda hela dokumentu ne’e ikus mai hetan duni aprovasaun no ministru mós asina ona dokumentu atu selu kontentór refere.
Tanba kontentór ne’e loke ona husi Afándega tuir lei haruka maibé sorumutuk entre Diretór Nasionál Ortrikultura no Estensaun ho Diretór Jerál Alfándega katak sei xave fali kontentór ne’e no MAP prosesa osan, kuandu sai ona mak hafoin bele foti kontentór hirak ne’e.
“Sasán sira ne’e sei mai fali Ministériu Agrikultura no Peska ne’ebé ami sei aloka ba planu ne’ebé iha ona ba irigasaun neen ne’ebé durante ne’e ami estabelese ho Orsamentu Jerál Estadu. Materiál agrikóla ne’e doasaun husi Xina ne’ebé mai ho sasán, la’ós sosa ho osan Estadu no ha’u rasik mós laiha informasaun ne’e sosa ho osan hira”.
Sasán sira ne’e sei fó ba Grupu Agrikultór Integradu ne’ebé MAP estabelese hafoin irrigasaun ne’e hetan inaugurasaun no daudaun ne’e fó treinamentu ba sira.
Jornalista: Maria Auxiliadora
Editora: Rita Almeida
Lee mós http://www.tatoli.tl/2017/07/alfandega-apreende-ekipamentu-map-nian/
