Ekipa Revista Lafaek Sorumutu ho Prezidente Repúblika

0
167
Mariano Peregrino Noronha, Ilustradór Revista Lafaek hetan intervista hosi jornalista sira iha Palásiu Prezidénsia Nicolau Lobato, Bairu-Pité, kuarta ne'e, hafoin enkontru ho Xefe Estadu. Foto Tatoli/Xisto Freitas

DILI, (TATOLI) – Ekipa Revista Lafaek sorumutu ho Prezidente Repúblika, Francisco Guterres Lú Olo hodi ko’alia kona-ba lala’ok Revista Lafaek durante eziste iha Timor.

Revista ne’e eziste durante tinan 17 (hahú 2000), foka liu-ba matéria literásia (oinsá atu hakerek), numerásia (oinsá atu bele konta) no jogu Kadi Kakutak ba labarik sira hosi pré eskolár, terseiru anu, kuartu anu to’o kintu anu, ba profesór sira nomós ba komunidade sira ne’ebé maka lahatene lé.

“Progresu ne’e la’o di’ak tanba komunidade barak maka simu Revista Lafaek ne’e no hatene ona maneira atu lee oinsá. Revista ne’e mós hakerek oinsá atu dada timoroan sira atu lé tanba istória ne’e kona-ba Timor”, dehan Mariano Peregrino Noronha, Ilustradór Revista Lafaek ba jornalista sira iha Palásiu Prezidénsia Nicolau Lobato, Bairu-Pité, kuarta ne’e, hafoin enkontru ho Xefe Estadu.

Antes ne’e, tinan 2010, produsaun Revista Lafaek konsege paradu tanba doadór sira laiha orsamentu atu kontinua projetu. Lafaek foin hahú produsaun tanba patrosina hosi Embaixada Nova Zelandia iha Timor-Leste no Ministériu Edukasaun Timor-Leste.

Mariano esplika vizaun hosi Revista Lafaek maka atu hasa’e timoroan sira nia nível kuñesementu iha área edukasaun.

Nia haktuir dalaruma sira infrenta dezafiu iha área rurál tanba iklima ne’ebé ladún favorável no estrada ladún di’ak, tanba ne’e difikulta distributór sira hodi distribui revista.

Produsaun ba revista ne’e kada fulan haat (tinan ida edisaun tolu) ho ezemplár 9000 ba komunidade baibain nomós ba eskola hotu-hotu iha Timor laran.

Iha biban ne’e, Xefe Estadu kontenti tanba iha ona revista ida ne’e é atu apoiu edukasaun iha Timor-Leste no sujere atu kontinua produs revista ne’e ba oin.

Jornalista: Xisto Freitas

Editora: Rita Almeida

HUSIK IDA HATÁN