CNRT La Senti Derrota iha Eleisaun

0
535
Sekretáriu Jerál Partidu CNRT, Francisco Kalbuady Lay inkontru ho Prezidenti Repúblika, Dr. Francisco Guterres Lú-Olo, hodi ko´alia kona-ba kontribuisaun ba estabilidade no páz.

DILI (TATOLI)—Sekretáriu Jerál Partidu Congresso Nacional da Reconstrução de Timor (CNRT), Francisco Kalbuady Lay hateten CNRT la sente derrota iha eleisaun parlamentár tanba rezultadu eleisaun ne´e hatudu katak laiha partidu ida manán maibé povu maka manán.

“Mensajen hosi povu ne´e klaru katak povu hakarak páz no estabilidade no povu hakarak hotu-hotu serbisu hamutuk,” Kalbuady ko´alia kestaun ne´e ba jornalista sira iha Palásiu Prezidénsia Repúblika, Bairu-Pité, Dili, kuarta ne´e, hafoin inkontru ho Prezidenti Repúblika, Dr. Francisco Guterres Lú-Olo.

Nia hatutan, mensajen hosi povu mós hatudu katak rai ida ne´e kontinua presiza líder antigu sira nia prezensa atu konstrui.

Kalbuady informa katak sorumutu ho Xefi Estadu Lú-Olo la ko´alia kona-ba formasaun governu tanba partidu CNRT seidauk deside no sei foti desizaun tama governu ka lae liuhusi konferénsia ne´ebé sei hala´o iha 29  Jullu.

“Ami sei iha konferénsia entaun desizaun hotu-hotu ne´e tenki mai hosi konferénsia,” atuál Ministru Turizmu dehan no biban ne´e nia fó parabéns ba povu tomak tanba asegura eleisaun parlamentár la´o ho páz ka hakmatek.

(Jornalista: Xisto Freitas)

(Editór : Manuel Pinto)

HUSIK IDA HATÁN