CLN Sosa Ona Produtu Hare Tonelada 86

0
64
Prezidente Konsellu Administrasaun Sentru Lojístika Nasionál, Nívio Magalhães lansa Programa Sosa Hare iha Suku Raifun, Postu Administrativu Maliana, Munisípiu Bobonaru. Foto/CLN.

DILI (TATOLI)-Sentru Loístika Nasionál (CLN-sigla iha portugés), Ministériu Komérsiu Indústria no Ambiente (MKIA) ba dahuluk iha tinan 2017 hahú ona sosa produtu lokál hare tonelada 86. 639.94.

Hafoin iha loron 23 Juñu 2017, CLN lansa ofisialmente programa sosa hare iha suku Raifun, Munisípiu Bobonaru, ne’ebé halo intervensaun direta sosa hare ho presu kada kilo sentavu 40 husi grupu agrikultura no kooperativa ne’ebé Ministériu Agrikultura no Peska (MAP) estabelese.

Prezidente Konsellu Administrasaun Sentru Lojístika Nasionál, Nívio Magalhães ba TATOLI informa CLN mós halo ona kontaktu ho agrikultór sira iha Vemase, Laleia, Uatulari, Oebaba, Saré no Ermera atu nune’e CLN bele sosa haree husi agrikultór sira iha fatin ne’e no sei kontinua ba territóriu tomak.

Orsamentu ne’ebé utiliza atu sosa hare iha tinan 2017 ne’ebé Governu aloka hamutuk novicentos e dez mil dólares no sei sosa hotu ba hare.

“Karik kuantidade hare ne’e barak liu signifika CLN mós sei aumenta tan osan hodi sosa hare tanba bá oin CLN hakarak mak orsamentu ne’ebé aloka atu sosa foos ita bele utiliza iha rai-laran, la’ós atu ba liur, tanba ne’e mak CLN servisu hamutuk ho Ministériu Agrikultura no Peska tanba ministériu ne’e mak responsabiliza ba produsaun, sira tenke hasa’e produsaun atu nune’e iha futuru ita bele hamenus importasaun no dependénsia husi rai-liur”, Nívio hatete iha Bebora, ohin.

Programa sosa produtu lokál ne’e fó prioridade ba grupu agrikultór sira ne’ebé MAP harii maibé lataka dalan ba agrikultór sira ne’ebé latama iha grupu ne’e maibé sira móss bele halibur malu hodi forma sira-nia grupu.

“CLN bele fasilita sira halo ligasaun ho banku ka atu bá rejistu sira-nia grupu ne’e, CLN prontu nafatin atu fó apoiu ba sira, ne’ebé lataka dalan ba agrikultór sira ne’ebé seidauk hola parte iha asosiasaun ne’ebé MAP estabelese ne’e, sira mós bele forma sira-nia grupu”.

Nune’e mós agrikultór ne’ebé hamahon-aan iha grupu ruma, bele kontaktu ho CLN no hato’o proposta depois CLN tuun bá halo teste kualidade no haree kuantidade hare hafoin sosa. CLN mós haree prosesu bainhira sosa hare sei halo teste ba hare ne’ebé sosa tanba atu asegura kualidade hare no la’ós haree ba ezekusaun orsamentu. CLN tenke sosa hare ne’ebé ho kualidade no labele naran sosa de’it.

“Haree ba nia variedade hare ne’e atu labele kahur tanba kundu dulas nia kualidade ladi’ak, tanba ne’e mak ida-idak tenke haree ba nia variedade ne’e, sé karik Nakroma tau Nakroma, Membrano ne’e Membrano, labele kahur tanba ne’e mak CLN prontu atu sosa hare iha territóriu tomak iha ne’ebé de’it CLN sei to’o ho ojetivu mak atu insentiva agrikultór no motiva hodi hasa’e sira-nia produsaun”.

(Jornalista : Maria Auxiliadora)

(Editór : Manuel Pinto)

HUSIK IDA HATÁN