CCT Esporta Kafé Tonelada 90 ba EUA

0
31
Foto Espesial

DILI, (TATOLI)- Diretór  Kooperativa Kafé Timór (CCT-sigla iha Portugés), Sisto Moniz Piedade informa, CCT iha semana kotuk esporta ona kontentór lima ne’ebé prienxe ho kafé tonelada 90 ba Estadu Unidu Amérika (EUA).

Foto/Google.

Kafé ne’ebé esporta ba rai-liur ne’e, CCT rekolla husi Autoridade Munisipál Ermera, Munisípiu Likisá, Aileu, Ainaru no Manufahi, munisípiu sira ne’ebé mak iha poténsia boot ba agrikultór kafé nian.

“Tanba tinan ne’e iha mudansa klimátika, kafé-fuan fuan mós ladún iha no to’o agora maizumenus ami hola de’it kafé tasak ne’e iha cinco mil toneladas”, Sisto dehan via telemovel, ohin.

Kafé-kulit mean ne’ebé CCT hola iha agrikultór kafé nian ne’e, kada kilo ho presu 0.35 iha toos maibé kuandu lori ba fábrika CCT, folin kafé sa’e ba sentavu 0.41 tanba sura ho trasporte agrikultór kafé sira-nian tanba CCT uza pola rua, ida mak hola iha agrikultór sira-nia fatin no pola seluk mak sira mai iha fábrika.

Diretór CCT ne’e relata sobre kafé Timór ne’ebé esporta ba estranjeiru katak kuaze ema barak gosta liuliu iha starbucks nian no fa’an lori naran Timor-Leste nian iha estranjeiru ho marka mounth Ramelau.

“Mas kafé mak lato’o de’it, dalaruma sira husu barak maibé lato’o hanesan tinan ida ne’e, sira husu maizumenus hakarak fa’an to’o kontentór 100 maibé iha realidade kafé laiha no susar tebes tanba mudansa klimátika, depois ita-nia kafé mós tuan ona, entaun nia produsaun hahú menus”, Sisto relata.

Ho produsaun ne’ebé menus no pedidu husi kompradór barak tebes, no estimasaun CCT nian atu halo esportasaun kafé to’o kontentór 100 maibé kafé lato’o, CCT sei hola nafatin to’o kafé-fuan laiha mak foin para.

(Jornalista : Maria Auxiliadora, Editór : Manuel Pinto)

HUSIK IDA HATÁN