Caucus Konsidera Mídia Ladun Promove Feto Iha Polítika

0
60
Diretora Fundasaun CAUCUS, Paula Corterel Araujo. Foto Tatoli/Zezito Silva

DILI, (TATOLI) – Mídia Timor-Leste tantu mídia imprime no elektrónika ladun fo importánsia atu promove feto iha vida polítika.
“Loos duni katak mídia sira ladun  importansia ba feto sira iha vida polítika liuhosi kobertura jéneru hodi valoriza direitu feto iha nasaun”, hateten Diretora Fundasaun CAUCUS, Paula Corterel Araujo ba jornalista iha Timor-Plaza, ohin.

Ho reportajen jéneru hosi mídia ne’ebé ladun valoriza feto, Diretora Caucus dehan mídia kuandu halo kobertura iha festa demokrásia ladun iha publikasaun feto sira nia partisipasaun iha vida polítika tanba ne’e organizasaun feto kria buletim rasik atu promove no divulga feto nia partisipasaun iha prosesu demokratizasaun.

Enkuantu, partisipasaun feto iha vida polítika ho pursentu 38 ne’ebé a’as iha Azean no Pasífiku, nune’e kuandu mídia hakarak halo kobertura tenke fó informasaun ne’ebé ho kobertura jéneru atu promove partisipasaun feto.

“Feto nia kampaña iha eleisaun suku ladun fó sai iha mídia liuhosi promove feto iha palku polítiku”, haktuir.

Enkuantu, eleisaun lejislativa iha 22 jullu presiza fó eduksaun sívika ba organizasaun feto no sosiedade sivíl atu labele lakon votu tanba ema ida nia votu bele determina nasaun nia futuru.

Maske nune’e, edukasaun sívika ne’e mós oinsá hasae partisipasaun no konsiénsia feto nian iha eleisaun lejislativa liuhosi valorizasaun votu.

“Bainhira ema ida valoriza votu, signifika sidadaun di’ak nia kontribuisaun hodi determina futuru nasaun nian”, haforsa.

Nia afirma, votu ema nian importante tanba ne’e tenke valoriza votu liuhosi partisipasaun feto iha vida polítika.

Jornalista: Zezito Silva

Editora: Rita Almeida

HUSIK IDA HATÁN