BNCTL Oferese Ona Kréditu Milloen 72 ba Setór Privadu

0
205
Prezidente Konsellu Administrasaun BNCTL, Brígido de Sousa ko'alia iha diskusaun Nasionál datoluk meza redonda entre setór privadu no públika ho tema “Asesu ba Kreditu” ne’ebé organiza hosi MEKAE, ohin iha Timor Plaza. Foto GPM

DILI, (TATOLI) – Banku Nasionál Komersiu Timor-Leste (BNCTL-sigla portugés) husi janeiru to’o fin juñu 2017  oferese ona kréditu millaun 72  ba emprezáriu nasionál hahú husi mikro empreza to’o mediu hodi fasilita  finansiamentu ba dezenvolvimentu setór privadu iha rai laran.

Prezidente  Konsellu Administrasaun BNCTL, Brígido de Sousa hateten kréditu ba mikro emprezas mak hakiak animal no kuda modo hamutuk  millaun ida resin, kreditu ba faan sasan ki’ik hamutuk rihun 400 haat resin.

“Kréditu ne’ebé ami fó ba emprezáriu ki’ik no mediu to’o oras ne’e hamutuk millaun 72ʺ, dehan nia iha Timor Plaza, ohin. Enkuantu, kréditu negosiu ba loja sira, karpintaria, hotélaria, písina totál millaun sia resin.

Tuir nia, kréditu ne’ebé BNCTL fó ba kontratór ne’ebé ka’er projetu governu hamutuk millaun 26. “Kreditu ba investimentu hanesan halo otél, hola ekipamentu, inklui kréditu ba agrikultor kuda kafé iha Ermera hamutuk milloen ida resin no kréditu seluk tan”, hatutan tan.

BNCTL oferese kréditu hirak ne’e ho funan ki’ik husi prosentu 13 mai kraik. Maibé, Brígido de Sousa la públika detalla totál emprezáriu nasionál hira maka benefisia ona kréditu husi BNCTL.

Jornalista: Agapito dos Santos

Editora: Rita Almeida

HUSIK IDA HATÁN