Armazenamentu Kombustivel ANPM Fó Lisensa Ba ETO

0
429
Diretór Ezekutivu ETO, Nilton Telmo Gusmão dos Santos . Foto/ETO.

DILI (TATOLI)-Autoridade Nasionál Petróleo no Minerál (ANPM) emite ona lisensa operasaun ba instalasaun no operasaun infraestrutura armazenamentu ba kompañia Esperansa Timor Oan (ETO) ne’ebé sai hanesan investimentu privadu no nasionál ida iha Timor-Leste hodi diversifika ekonomia.

Diretór Ezekutivu ETO, Nilton Gusmão hatete depózitu armazenamentu kombustivel dezde hahú envolve iha atividade komersiál kombustivel no la’o tuir realidade no buka atu hakbiit-aan no hodi diversifika ekonomia nu’udar empreza nasionál ne’ebe konsiente katak dezenvolvimentu atu la’o di’ak parte hotu tenke kontribui atubele hala’o dezenvolvimentu.

“Ami foku tebetebes iha ami-nia área, apezár ida ne’e ami tenke diversifika iha área lubuk ida ne’ebé ita hotu hatene maibé ninia atividade prinsipál ami nunka husik tempu uitoan de’it para trata ou kuida atividade ida ne’e depois bele lori susesu,” Nilton hatete iha Farol iha ámbitu asina kontratu ho ANPM hodi emite lisensa, ohin.

Nilton louva servisu ANPM hanesan órgaun reguladór tanba dezde Governu deside hodi harii ANPM komesa hatudu nu’udar órgaun regulador loloos iha país ida ne’e atu regula buat ne’ebé hala’o iha nasaun ne’e hodi evita autór ekonómiku sira ne’ebé hakarak halo sasán tuir sira-nia hakarak.

Realidade ida mak lisensa ne’ebé ETO hetan liuhusi prosesu lubuk ida, hafoin ANPM halo survey, inspesaun no halo vizita lubuk ida ba armazenamentu ho objektivu atu oinsá bele garante abastese kombustivel ida ne’ebé ho kualidade, kontinuidade no kombustivel ne’ebé fó presu razoavel liu ba komunidade no autór ekonómiku ne’ebé eziste iha rai ida ne’e.

Ba futuru Nilton promete ETO sei fó serbisu ida ba ema hotu no kontinua nakloke ba hanoin ruma husi AMPN atu mellora serbisu di’ak liu tan.

Prezidente ANPM, Gualdino da Silva hatete ETO hatudu nia interese atu halo investimentu iha armazenamentu kombustivel iha rai-laran no esforsu tomak ne’ebé ETO hatudu atubele aliña ho regulamentu ne’ebé ANPM rasik haree katak la’ós buat ida fasil iha tempu badak bele prienxe.

Lisensa armazenametu ba Kompañia ETO mak ba dahuluk iha Timor-Leste ne’ebé hahú hatama aplikasaun iha tinan 2013, lansa fatuk dahuluk ba armazenamentu iha tinan 2014 no hetan aprovasaun iha Marsu 2017, nune’e bele ona hahú operasaun ba lisensa ida ne’e no ANPM buka nafatin servisu hamutuk ho operadór tomak inklui ETO atu nune’e hatudu di’ak liután ba públiku maneira servisu ne’ebé seguru tuir mellór prátika indústria nian ne’ebé adotada iha nasaun seluk no laiha diferensa.

(Jornalista : Maria Auxiliadora, Editór : Manuel Pinto)

HUSIK IDA HATÁN