Alternativa Koligasaun Partidu ba Governasaun 2017

1
1064
Camilo Ximenes

DILI (TATOLI)–Iha eleisaun parlamentar loron 22 fulan jullu de 2017 nia resultadu hatudu katak husi partidu 21 ne’ebé mak konkore iha eleisaun ne’e no partidu 5 konsege ultra passa bareira 4 %  hanesan tuir mai: Partidu FRETILIN 23 kadeira, Partidu CNRT 22 kadeira, Partidu PLP 8, PD 7 no Partidu KHUNTU 5 kadeira i la iha partidu ida maka konsege manan maioria absoluta.

Depois de resultadu provisoriu eleisaun parlamentar ne’e hahu segunda madrugada iha redi sosial sira komesa hanoin oinsa atu bele forma governu no alternativa governasaun ne’ebé diak iha futuru 2017 to’o 2022, tamba saida mak hanoin ida ne’e bele mosu iha redi sosial no iha versaun oin-oin  husi sosiedade timor laran tomak iha resposta ne’ebé  simples deit katak povo kumpri ona nia dever nu’udar sidadaun ida maibe nia (povo) sei husu nia direitu nu’udar mos sidadaun iha futuru depois de formasaun governu.

Maske iha Konstituisaun da Repúblika Timor Leste kapitulu rua (II) koalia kona-ba formasaun no responsabilidade i iha artigu atus ida nen (106) relativamente ba nomeasaun i iha alineia dahuluk Primeiru-Ministru partidu ne’ebé hetan votu barak liu ka partidu sira iha aliansa ho maioria parlamentar maka hatudu no Presidente da- Repúblika maka nomeia, rona tiha partidu polítiku ne’ebé iha representante iha parlamentu Nasional.

Camilo Ximenes

Tantu resposta simples ne’ebé mensiona iha leten no iha Konstituisaun da Repúblika klaru ona ba povo maibe dala barak mos povo sempre prekupa kona-ba situasaun siguransa iha rai laran i povo mos lakohi atu mosu problema tamba deit konflitu de interesse entre lider politiku sira hodi povo sai vitima ba konflitu hirak ne’e,tamba povo trauma ona iha eleisaun 2007 ne’ebé partidu FRETILIN maka manan maske ho maioria simples maibe Presidente da Repúblika la konvida FRETILIN maibe bolu partidu CNRT hodi forma Governu Aliansa Parlamentar ne’ebé lidera husi maun Bo’ot Xanana Gusmao,iha ne’e partidu FRETILIN la konkorda ho desizaun husi Presidente da Repúblika no FRETILIN konsidera Governu Aliansa Maioria Parlamentar hanesan governu defaktu to’o iha eleisaun 2012.

Será ke formasaun governu iha eleisaun de 2007 sei mosu fali iha formasaun governu de 2017.? ka iha alternativa seluk..? nia resposta lae ho razaun simples katak situasaun iha tinan 2007 la hanesan ho tinan 2017 i mos Presidente da Repúblika Francisco Guterres ne’ebé mak formadu iha direitu no iha kapasidade bele interpreta Konstituisaun da Repúblika diak liu i mos ema ne’ebe halo Konstituisaun ne’e rasik.

Kuandu ita atu koalia kona-ba koliga iha governasaun ida, presiza kumpriende konteudu kolega ne’e hodi labele mosu iha sentidu seluk para atu lori ita nia interpretasaun oin-oin tuir versaun ema ida-idak nian iha kontestu politiku Timor-Leste hodi fo espasu ba ema seluk (Pihak ketiga) atu bele destroi Nasaun no povo iha rai ida ne’e, tamba iha diskursu lider politiku sira liu-liu fundadores da Nasaun sira sempre temi bei-beik” laiha tan lider ida mak hanoin ladiak ba rai no povo ida ne’e, tamba ukun-an laos ema entrega deit maibe sosa ruin ho ran povo ida ne’e nian” i povo labele halerik ba bei-beik maibe partidu politiku hanesan instrumentu ida hodi bele hetan poder politiku atu bele halo mudansa ba sosiedade ida iha kontestu Timor- Leste nian hodi alkansa independensia.

Tuir hakerek nain nia hanoin alternativa koligasaun ne’ebé diak iha governasaun 2017 to’o 2022, iha opsaun hat (4) opsaun dahuluk mak partidu FRETILIN+ CNRT, opsaun daruak FRETILIN+ CNRT+PLP, opsaun datoluk FRETILIN + PLP+PD i opsaun ikus FRETILIN+PLP+KHUNTU ka bele iha visi-versa entre CNRT+PLP+PD ka iha posibilidade seluk CNRT+PLP+KHUNTU, partidu PLP no partidu PD hanesan feto bonita ida, maibe labele ignora KHUNTU  tamba partidu KHUNTU hanesan mos feto bonita ida ne’ebe laos deit bonita maibe ho karater ne’ebé kalma no humilde hanesan alternativu diak ida ba partidu bo’ot rua hanesan FRETILIN ho CNRT hodi halo kasamentu, tamba koligasaun iha partidu politiku iha governasaun ida hanesan mos entre feto ho mane ida ne’ebe buka nia par atu halo kasamentu, maibe par ne’ebé mak nia hetan presiza kumpriende situasaun ema ida nian tuir kustume (Adat) Timor Leste nian, i sentidu kasamentu ne’e rasik ba ema timor hanesan integrasaun entre familia ida ho familia seluk laos propriu deit ba ema ne’ebe atu forma familia ka atu kaben, tamba ne’e hili par ho diak atu bele diak ba familia no diak ba par ne’ebe atu kaben, nune presiza tenki fihir didiak antes eskolha par hodi kaben. Karik maluk le’e nain sira bele iha pergunta tamba saida mak FRETILIN ho CNRT garantia ona governasaun tenki presiza tan PLP..? Ita hotu hatene katak atu hetan maioria iha parlamentu hodi defende plano no programa governu nian laiha duvida, maibe iha indikador seluk ne’ebé mak sai fator determinante mak atu garantia paz no estabilidade hodi halo desenvolvimentu liu-liu planu desenvolvimentu 2020 i 2030 atu lao ho diak no susessu presiza duni dalan ida ne’e hanesan uniku salusaun atu resolve interesse de konflitu entre lider partidu hanesan Mari Alkatiri (lider FRETILIN) ho Xanana Gusmão (lider CNRT) i Taur Matan Ruak ( lider PLP) i tinan 2017 hanesan mos tempu ikus ba “FRENTE ARMADA” sira hodi rota ukun nian to’o tinan 2022 tamba sira nia dedikasaun ba libertasaun nasional no presiza tan dala ida kontribuisaun liberta povo husi kiak no mukit i nune loron ikus sira labele rai iklima ne’ebé maka la saudavel ba jerasaun 91 ka jerasaun foun sira i sai mos hanesan modelu diak ida hodi jerasaun foun sira bele banati tuir iha futuru.

Hakerek nain Alumni Instituto Superior Ciencias Sociais e Politicas Universidade Tecnica Lisboa, agora Docente no Diretor departamentu iha Departamento Cincia Politika Fakuldade Siensias Sosiais da UNTL.

1 COMMENT

  1. Parabens ba Analiza ida ne’e; maibe hare ba situasaun real agora karik Analiza ida ne’e LA konsegue hetan, tamba dezisaun Unanimidade ne’ebe mak CNRT hasai katak sei sai hanesan Opozisaun. nune’e karik horas ne;e posibilidade boot ne’ebe mak ita bele hare mak posibilidade Koaligasaun entre FRETILIN,PD,e KHUNTO… tamba razaun husi Partido segundo e Terceiro Lugar hasai ona statementu foun hodi sei sai deit nudar Opozisaun.
    tamba ne’e hotu hein katak Komunikasaun ne’ebe mak halo dadauk ne’e bele hetan vantajem ida ne’ebe mak diak entre PArtidu Forma Governo Foerte nune’e mos Opozisaun Forte hodi asegura sistema Democrasia ida ne’ebe mak forte iha tinan lima nia laran ba oin 2017-2022
    espera

HUSIK IDA HATÁN