Alfándega Apreende Ekipamentu MAP Nian

0
103
Foto Espesial

DILI, (TATOLI)-Alfándega apreende ona ekipamentu agrikultura hamutuk kontentór 19 ne’ebé oferese hosi nasaun Xina nu’udar doasaun ba Ministériu Agrikultura no Peskas (MAP) tanba ministériu lafoti sasan iha kontentór durante fulan-ualu maske antes ne’e Alfándega fó ona notifikasaun ba Ministériu.

Diretór Nasionál Operasaun Alfándega, Julio José Ximenes, esplika ohin Sesta (14/07) parte Alfádega loke ona kontentór 19 ho nia manifestu dokumentu ba Diresaun Nasionál Agrikultura, Ortikultura no Estensaun ne’ebé nakonu ho ekipamentu ba agrikultura hanesan materiál peska nian husi Kompañia Timor South ba Diresaun Jerál Peska, MAP nian ne’ebé importa husi nasaun Xina hanesan doasaun ba MAP tanba liu ona tempu ne’ebé determina.

Bazeia ba Dekretu Lei númeru 11/2004 iha artigu 63 kuandu liu ona loron 90 automátikamente sasán hirak ne’e afavór ba Estadu, nune’e kontentór sira ne’e Alfándega apreende. Basa  Kontentór hirak ne’e to’o iha Portu Dili, iha fulan-Setembru 2016 kuaze tama fulan-ualu no Alfándega fó ona notifikasaun no koñesimentu iha MAP maibé laiha resposta nune’e tuir regra Alfándega iha podér atu ezekuta regra ne’ebé iha.

“Haree tuir regra no prosedimentu Alfándega nian katak liu ona períodu ne’ebé iha automátikamente Alfándega liuhusi prosesu ida ne’e no detein sasán ida ne’e tuir pareser legál bainhira na’in abandona merkadoria hirak ne’e,” Julio José Ximenes afirma iha Portu Dili, ohin.

Nia dehan, kontentór ida husi kompañia Timor South ne’e doasaun ba Diresaun Jerál Peska ninian maibé husi diresaun ne’e halo fali karta koñesimentu ba Diresaun Jerál Alfándega atu esporta filafali ba nasaun orijen no kontentór 19 ba Diresaun Nasionál Agrikultura, Ortikultura no Estensaun, Alfándega seidauk simu koñesimentu ruma husi MAP.

Tanba seidauk simu koñesimentu ba kontentór 19 to’o agora no liu ona loron 90 maka Alfándega iha obrigasaun atu hatene sasán saida mak iha kontentór laran nune’e Alfándega loke hetan iha kontentór 19 ne’e kuaze ekipamentu agrikultura nian. Iha tratór lubuk ida ba fila rai nian, kuda haree, dulas hare, baku hare, mákina sekadór, no seluk tan.

Iha parte seluk Diretór Nasionál Agrikultura, Ortikultura no Estensaun, Amaro Ximenes via telemovel rekuñese ekipamentu hirak ne’e ajuda hosi Xina, maibé la’ós sosa  ho Orsamentu Jerál Estadu (OJE).

“Sasán ne’e tama mai, ami tau tiha osan U$36.000 mil atu selu ba kontentór ne’e, maibé osan ne’e bá afinál selu tiha fali ba sasán ida uluk husi Xina, fini íbrida no lakonsege selu tanba osan ne’e selu tiha fali ba ida ne’e, maibé loloos osan ne’e atu selu ba mákina ne’e, komu deve Ministériu Agrikultura nian ida ne’e iha ne’ebá, entaun ami lakonsege selu ho orsamentu 2016 tanba orsamentu alokadu ne’e selu tiha fali ba ida uluk nian,” Amaro Ximenes esplika

No dehan tan, iha planu orsamentu tinan 2017 atu selu kontentór osan laiha tanba informasaun tarde. Hodi nune’e nia rasik hasoru malu ona ho Diretór Jerál Alfándega nian, maibé parte Alfándega mantein saida mak lei haruka katak, tenki loke kontentór depois haree hotu sei rejistu no submete ba Ministra Finansa depois sei toma desizaun ikus no kontentór sira ne’e responsavel Alfándega nian, nune’e kontentór mantein iha Portu.

Relasiona ho kazu ne’e, haree ba dokumentu manifestu sasán ne’e mensiona katak ekipamentu ba MAP nian, maibé sobre detallu to’o ohin loron Alfándega seidauk hetan deskrisaun kona-ba materiál sira ne’ebé importa husi Xina ne’e.

Entertantu Ministru Agrikultura no Peska, Estanislau Aleixo da Silva hatete, kontetór sira ne’e tanba iha atrazu ba pagamementu maibé foin lalais asina tiha ona CPV para halo pagamentu maibé sobre loke kontentór ne’e Ministru rasik laiha informasaun kona-bá ne’e.

(Jornalista : Maria Auxiliadora, Editór : Manuel Pinto)

HUSIK IDA HATÁN