AIFAESA Apreende Tabaku Eletróniku Iha Estabelesimentu Xineza

0
58
Tabaku eletróniku ne'ebé apreende iha Aeroportu Dili. Foto/AIFAESA.

DILI, (TATOLI) – Inspesaun ne’ebé hala’o durante fulan rua nia laran husi Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) apreende (foti) ona tabaku eletróniku ne’ebé fa’an iha estabelesimentu (loja) Xineza sira ho kuantidade kuaze 60.

Diretór Operasaun AIFAESA, Gabriel da Costa.

Tuir Dekretu Lei númeru 14/2016, 8 juñu iha artigu 16 hatete, sasán sira hanesan sigarru eletróniku proibidu  atu fa’an no uza iha Timor-Leste.

Tanba ne’e operadór ekonómiku sira ne’ebé fa’an, AIFAESA sei foti auto notísia kontra ordenasaun hasoru establesimentu hodi submete ba Gabinete Apoiu Jurídiku hodi notifika empreza hodi defende-aan.

Diretór Operasaun AIFAESA, Gabriel da Costa esplika tuir artigu 26 iha Dekretu Lei, ema ne’ebé fa’an sigarru eletróniku sei multa ki’ik liu mak U$100 no boot mak U$5000.

“Durante fulan rua nia laran hafoin ami hetan despaxu husi Primeiru Ministru atu haree sigarru ne’e duni no ami servisu konjuntu ho Ministériu Saúde ho PNTL no hetan duni estabelesimentu haat maka fa’an sigaru eletróniku hanesan xinés sira ne’e no agora daudaun prosesu la’o hela no notifika sira para selu multa tanba lei bandu”, Gabriel informa iha Matadouru, ohin.

Apreensaun  hala’o barak liu iha estabelesimentu xineza no iha empreza ida husi Indonézia. “Sigarru ne’e ami foti iha loja xinés sira ne’e, ema boot raru atu uza maibé ita haree labarik eskola oan sira ne’e mak hola liuliu pre-sekundária no sekundária. Nia presu lahanesan, balun U$25, 35 no to’o 100 tanba nia kualidade lahanesan”.

Maski lei bandu maibé sigarru eletróniku ne’e konsege tama iha Timor-Leste, nune’e AIFAESA daudaun ne’e servisu hamutuk ho Alfándega hodi evita sigaru sira ne’e tama.

“Ami sei kontinua nafatin halo inspesaun ba loja sira ne’e liuliu ba sigarru tanba sigarru ne’e tama tiha ona iha ita-nia rai ho kuantidade barak ona no maneira ami atu hetan ida ne’e, ami halo hanesan intelijen ida bá buka tuir fatin sira ne’ebé importa tama no husu ona Alfándega atu fó dadus empreza hatama sigaru ne’e para haree tuir ba sira-nia armazein”.

Aleinde apreende iha loja, iha semana kotuk loron 20/07 servisu Alfândega iha Aeroportu no AIFAESA apreende mós sigarru elektróniku husi sidadaun estranjeiru iha Aeroportu Internasionál Nicolau Lobato. Nune’e Servisu Custom iha Aeroportu sei halo relatóriu ba Diresaun Jerál Alfándega no halo auto entrega ba AIFAESA hodi prosesa tuir lei ne’ebe vigora.

Tabaku eletróniku ne’ebé AIFAESA foti iha oioin ne’ebé balun hatama de’it mina hafoin hanehan botaun nune’e suar sai nomós iha modelu ida ne’ebé karrega hanesan ho telemovel ne’ebé daudaun ne’e rai hela iha edifísiu AIFAESA no prosesu hotu sei halo destruisaun.

Jornalista: Maria Auxiliadora

Editora: Rita Almeida

HUSIK IDA HATÁN