Aban CNE Briefing Parpol Ba Debate Iha CNE

0
59
Prezidente CNE, Alcino de Araújo Baris. Foto mídia CNE

DILI (TATOLI)-Prezidente Komisaun Nasionál Eleisaun-CNE Alcino Baris, informa, aban, Kinta (13) CNE sei fó briefing ba Partidu Polítiku hamutuk 20 no Bloku Koligasaun ida relasiona ho debate entre partidu polítiku iha loron 17-18 iha salao Laline Larigutu, CNE.

Relasiona ho ida ne’e, ohin, Kuarta (12/07) Prezidenti CNE Alcino Baris hasoru malu ho Primeiru Ministru Interino, Agio Pereira hodi informa kona-bá planu debate nian, no iha tempu hanesan Alino Baris konvida mós PM Interinu Agio Pereira hodi partisipa iha debate refere, tanba debate ne’e mak sei determina lideransa ba futuru  Timor-Leste iha periode 2017-2022.

Debate ne’ebé sei transmite direta husi Radio Televisaun Timor Leste, E.P, atu fó oportunidade ba Partidu polítiku atu espresa sira nia programa hodi haburas demokrasia iha rai laran.

Iha debate ne’e, Primeiru Ministru Interino promete sei partisipa hamutuk ho konvidadus seluk Prezidenti Repúblika Francisco Guterres Lú Olo, Prezidente Parlamentu Nasionál Aderito da Costa Hugo no orgaun  soberanu seluk ne’ebé CNE hato’o ona konvite ba sira.

ʺPrimeiru Ministru  interinu elojia kna’ar CNE hodi fiskaliza ba eleisaun  no preparasaun kona-ba debate no seminar ne’ebé CNE organiza atu halo, ʺ Alcino Baris haktuir sentimentu PM Interino nian.

Entertantu iha loron aban, (Kinta-red) aleinde fó briefing CNE mós aban distribui numiro sorteiu debate ba partidu politiku sira no perguntas ne’ebé sei koloka ba Parpol iha debate.

Enkotru entre Prezidenti CNE ho PM interino koalia mós kona-bá seminar ba partidu politiku no observador internasionál ne’ebé sei hala’o husi CNE iha loron 20 fulan Jullu ne’e iha Dili.

ʺSeminar  iha loron 20 ne’e oinsa atu fahe informasaun ba observador internasional kona-bá prosesu kampaña no lalaok eleisaun. Seminar ne’e sei abertura husi Prezidente Repúblika Francisco Guterres Lú Olo,” Alcino informa tan.

(Jornalista: Agapito dos Santos, Editór : Manuel Pinto).

HUSIK IDA HATÁN