DILI (TATOLI)—Primeiru Ministru (PM) Rui Maria de Araújo afirma, Governu interansante ho modelu apoiú koperasaun ne’ebé Governu Korea do Súl oferese liuhosi projeitu Rehabilitasaun Eskola Sekundária Tékniku Vokasionál Bekora,
ʺHa’u hanoin ida ne’e modelu ida ne’ebé tenki sai referensia ba Governu bainhira halo parseira ho parseiru dezenvolvimentu ne’ebé iha ba Futuru,ʺ PM Rui Maria de Araújo hato’o iha nia Diskursu iha seremónia entrega Projeitu rehabilitasaun eskola Sekundária Téknika Vokasionál bekora husi Governu Korea do Súl no implementa husi KOIKA ba Governu Timor Leste iha Kinta ohin, 20/07.
Governu Korea do súl oferese millaun 9 dolar amerikano ba projeitu Rehabilitasaun Eskola Sekundária Tékniku Vokasionál Bekora, ne’ebé iha sala aprendeziazen hamutuk 30 resin, sala ba profesor, aula, laboratóriu, Cantina no seluk tan.
Ba futuru governu Korea Súl halo manutensaun ba eskola ne’ebé sira rehabilita durante tinan rua no sei apoiu tan profesor voluntariu husi Korea hodi tulun estudante sira iha eskola refere.
Ho ida ne’e Xefi Governu husu ba ministériu edukasaun sei uja modelu ida ne’e bainhira estabelese koperasaun ho parseiru dezenvolvimentu sira seluk iha futuru.
Tanba Korea la’ós apoiú de’it ba rehalitasaun, formasaun profesores, apoiú ekipamentu laboratóriu, maibé haree oinsa kontinuidade apoiú ba manutensaun durante tinan rua, apoiú profesor voluntariu husi Korea hodi fasilita prosesu aprendejiazen ba Futuru.
Hodi sextu Governu nia naran PM Rui hato’o agradese ba Governu Korea do Súl ba apoiú prosesu dezenvolvimentu.
No husu ba Eskola Sekundária Tékniku Vokasionál Bekora tenki utiliza fasilidades ho di’ak, hodi prepara estudante sira ho Kualidade atu bele emprega ba kampu servisu.
Iha fatin hanesan Embaixadór Korea ba Timor-Leste, Kim Kin Nam hateten, agradese ba Governu Timor-Leste no KOIKA tanba implementa projeitu ne’e ho susesu.
Nia garante, Eskola Sekundária Tékniku Vokasionál Bekora sei sai eskola tékniku ida di’ak liu iha rai laran. Husu mós atu estudante sira tenki esforsu atu estuda maka’as iha tempu eskola no finde semana tanba imi mak sei sai enjinaria mekanika, konstruksaun no seluk tan ne’ebé iha kualidade atu apoiú prosesu dezenvolvimento Timor-Leste.
Entertantu Diretór eskola Téknika Vokasionál Bekora, Francisco Guterres L, CG hateten, eskola Tekníka Profesionál Bekora iha alunus hamutuk ema nain 900 resin ho profesor permanenti nain 63, profesor kontratadu nain 19, administrasaun nain 6 no guarda eskola nain 4.
Eskola Sekundária Tékniku Vokasionál Bekora, konstrui edifisiu ne’e hahú prosesu aprendeziazen durante okupasaun indonézia iha tinan 1987/1988 no reativa iha era independensia Jullu 2000.
Departementu neen maka oras ne’e ejiste iha eskola refere mak hanesan, Departementu Konstruksaun Sivil, Mekánika Automóvel, Mekánika Produsaun, Elektrónika, Eletrisidade no Informátika.
(Jornalista:Agapito dos Santos)
(Editór : Manuel Pinto)
