DILI, (TATOLI) – Prezidente Repúblika, Francisco Guterres Lú Olo kontinua husu ba Polísia Nasionál Timor-Leste (PNTL) no FALINTIL-FDTL (Forsa Defeza Timor-Leste) atu mantein seguransa durante eleisaun no formasaun setímu governu konstitusionál.
“Prezidente apresia ho servisu polísia ne’ebé hetan apoiu hosi FALINTIL-FDTL, husu nafatin koordena malu para asegura festa demokrasia la’o ho di’ak, nune’e rezultadu kontazen votu labele mosu instabilidade”, dehan Ministru Interior, Longuinhos Monteiro ba jornalista sira iha Palásiu Prezidensiál Bairo-Pite, ohin, hafoin atualiza situasaun seguransa ba Xefe Estadu.
Akompaña hosi Majór Jenerál F-FDTL, Lere Anan Timor, governante ne’e informa mós situasaun kampaña ba loron ikus nian hosi partidu 21 nomós movimentasaun ema estranjeiru tama no sai teritoriu.
“Ami simu orientasaun hosi Prezidente Repúblika atu hadi’a di’ak liutan pretasaun servisu ba ita nia komunidade, liliu iha parte seguransa no defezaʺ, realsa nia.
Nune’e mós, ulun boot forsa, Lere Anan Timor apresia ho maturidade politíka husi lideransa partidu polítiku no povu hatudu durante kampaña ba eleisaun parlamentár tanba kontinua mantein dame no estabilidade.
“Ha’u fó parabens ba ita nia povu, ita nia joven, liliu ita nia lidér partidu politíku”, espresa nia.
Jornalista: Agapito dos Santos
Editora: Rita Almeida
