DILI, (TATOLI) – Sekretariadu Ezekutivu Liga Futeból Amadora (LFA) liuhusi Diresaun Disiplina no Étika desidi fó sansaun ba jogadór Assalam FC, Dedy Susilo Pramono atu labele partisipa iha jogu tuir mai, hein prosesu verifikasaun hosi LFA tanba indikasaun falsifika dukumentu.
“Jogadór refere halo infrasaun hodi falsifika dukumentu hanesan uza kartaun eleitorál Timor-Leste nian, maibé iha inísiu jogadór refere rejista iha diresaun verifikasaun LFA, hanesan jogadór estranjeiru, ho nia identidade tuir pasaporte hosi Indonézia” haktuir karta notifikasaun ne’ebé maka asina hosi Prezidenti Diresaun Disiplina no Étika-LFA, Octavio da Conceição, kuarta (12/7/17), ne’ebé Ajénsia TATOLI asesu hosi mídia LFA iha kinta ne’e.
Tuir karta ne’e, infrasaun disiplinár mai hosi jogadór refere iha jogu ne’ebé maka hala’o iha 4 jullu 2017, kontra ekipa Atlético Ultramar hosi munisípiu Manatuto, rezultadu ikus Assalam manán ho golu 2-1.
Notifikasaun iha leten bazeia ba artigu 18 Kódigu Konduta jogu Liga Futeból Amadora.
Jornalista: Xisto Freitas
Editora: Rita Almeida
