iklan

NASIONÁL

MTAK-ETDA Realiza Formasaun Matadalan Turíztika ba Joven

MTAK-ETDA Realiza Formasaun Matadalan Turíztika ba Joven

Abertura Formasaun Guia Turiztika iha ETDA, Segunda (3/7). Foto Tatoli/Julia Chatarina

DILI, (TATOLI) – Ministériu Turizmu, Arte no Kultura (MTAK) parseiru ho sentru formasaun ETDA realiza formasaun ba joven timoroan sira iha área Tour Guide (Guia/mata dalan Turíztika) iha ETDA Komoro, ohin.

“MTAK hakarak dezenvolve timoroan sira atu hetan esperiensia iha área guia turíztika, sira bele liu husi eskola formál, maibé tenke iha mós formasaun hodi aumenta sira nia kapasidade no ajuda sira atu tenta hetan servisu iha futuru”, Diretora Peskiza MTAK, Carmen Pereira ba jornalista sira iha seremónia abertura.

Tuir nia, timoroan foin sa’e barak  mak remata ona eskola sekundária no universidade maibé sidauk iha esperiensia, entaun ho formasaun ida ne’e bele ajuda sira hetan esperiensia no hasa’e kapasidade.

Nune’e nia mós dehan, guia turíztiku halo parte fó serbisu no bukae ba joven sira ne’ebé tuir formasaun ne’e hodi bele akompaña bainaka sira husi rai liur ne’ebé buka informasaun bainhira vízita Timor-Leste.

“Ami la para iha ne’e de’it, sempre iha kontinuasaun kada tinan, liu-liu ba sira ne’ebé remata ona eskola no laiha buat ida atu halo, balun laiha kapasidade, entaun ho dalan ida ne’e bele ajuda sira”, tenik tan.

MTAK hetan apóiu orsamentu husi organizasaun mundiál turizmu atu realiza formasaun ne’e. Kada formasaun ne’e orsamentu hamutuk $15,200 fó apóiu ba ETDA atu realiza formasaun durante loron 10.

Partisipante mai husi munisípiu oin-oin no iha vontade hakarak atu tuir formasaun. Formasaun ne’e ho objetivu atu produz joven timoroan ne’ebé iha vontade hakarak atu hetan esperiensia liu-liu iha área guia turíztiku.

MTAK komesa formasaun ne’e iha IV governu, formasaun lubuk ida no iha área oin-oin mak halo ona ba timoroan hamutuk 4000 resin. Formasaun ne’ebé realiza ona iha rai laran nomós iha rai liur.

Jornalista: Julia Chatarina

Editora: Rita Almeida

iklan
iklan

Leave a Reply

iklan
error: Content is protected !!