Xanana Gusmão Sa’e Taxi

0
209
FOTO TATOLI

DILI (TATOLI)–Taxi ida ho numiro matrikula 24.178, halai liuhosi dirasaun estrada Bebora, entre Jornal Diariu Timor-Post ho Jornal Diario Nasionál nia oin, ema lubun ida ne’ebé mak hamrik iha edifisiu Jornal Diario Nasionál nian oin hakfodak hodi asiste Taxi refere tanba iha Taxi nian laran tula hela Maun Boot Kay Rala Xanana Gusmão, aktual Ministru Planiamentu no Investimentu Estratéjiku no aktual Prezidenti Partidu CNRT.

Xanana tun hosi Taxi

Oras hatudu 18H00, mais ou menus 20 metru antes ba edifisiu Jornal Nasionál Diario, Taxi ne’ebé hetan seguransa pessoal hosi Polísia ‘Eskoltu’ Maun boot nian para, Maun boot tun hosi Taxi hodi husu Eskoltu selu osan ba Taxi ne’ebé nia (Xanana) sa’e.

Maun Boot hetan kedan serku hosi Jornalista lubun oan ida ne’ebé hamrik iha fatin ne’e hodi hasai maun boot nia foto, maske nia hakat dadaun ona hodi ba labarik lubun oan ida ne’ebé hamrik iha Jornal Diario nasionál nia oin.

Xanana hasoru labarik sira

Hasoru tiha alin oan sira, Maske iha minutu balun nia laran de’it, relasaun maun boot ho labarik oan sira la’o iha ambiente haksolok nia laran, labarik ida ba ida seluk hakbesik án ba maun boot hodi husu hasai foto hamutuk alias selfie.

“Kiik hasai foto ho ha’u selu satu dolar, boot tenki selu 3 dolar,” Maun boot Xanana halo komik maibé liman lolo dadaun hakuak alin feto ida hodi hasai foto, Kinta (15/06) lokraik.

Spontania, Xanana husu, dosi faan iha ne’ebé? Alin oan sira hatan, ho haksok, Avo, dose faan iha sorin. Rona tiha ida ne’e Xanana so’e ain dadaun hodi bolu alin lubun oan ne’e tuir nian la’o ba faan dose fatin, iha kedan kampu futsal Bebora nia sorin.

Xanana fahe dosi ba labarik sira

Tia sira ne’ebé fa’an dose hakfodak, hodi koalia ba malu, “Avo Xanana” Xanana hakbesik án ba Tia sira ne’e hotu hodi foti dose iha toples oan ida lolo dadaun baluk ida-idak ba alin oan sira ne’ebé tuir nian, no dehan ba tia dose nain, sura tutuir dose ee, hafoin ne’e Xanana lolo liman ba kazaku metan ida be nia hatais hasai osan fó ba tia sira, nune’e fila fali ona hosi fatin faan dose akompaña ho sekretáriu estadu komunikasaun sosiál (SEKOMS) Nélio Isaac Sarmento ho Nain Jornal Diario Jorge Serrano hodi partisipa seremonia lansamentu Televisaun GMN.

(cml_tatoli)

HUSIK IDA HATÁN