Vitima Aktu Violentu Triste Ho MP

0
159
Ilustrasaun

DILI (TATOLI)—Lezadu Jeronimo Amaral da Silva (Jornalista) sente triste ho Despasu Ministériu Públiko (MP) NUC 0257/2016/PDDIL tanba iha despasu la haktuir kona-bá provadokumental USB (Universal Serial Bus) ne’ebé lezadu entrega ba Ministériu Públiku, iha kazu aktu violentu ne’ebé vitima hetan hosi arguido JT (membru polísia unidade tranzitu).

Ne’e mak karta Minteriu publiku nian bainhira simu USB.

Jeronimo dehan, nia respeitu tomak servisu Ministériu Públiku nian, maibé nia husu atu konsidera hotu provas ne’ebé nu’udar vitima nia aprejenta ona antes ne’e ba Ministériu Públiku.

“Bainhira ha’u haree didi’ak Despasu ne’e iha parte prova dokumental so hakerek de’it mak fotografia tahan 17 to’o 19, se nune’e ha’u husu ba ha’u nia án USB ida ha’u entrega ne’e oinsa,” Jeronimo Amaral da Silva informa ba TATOLI, hafoin ramata primeiru julgamentu iha Tribunál Munisipiu Dili, Kuarta (07/06).

Tuir Jeronimo USB ne’ebé nia intrega ho kor mean ida, iha USB ne’e nia laran rai video aktu violentu arguido JT (membru polísia unidade tranzitu) ne’ebé baku vitima iha loron 25 Jullu 2016, mais ou menus tuku 11:45, iha rua Kolmera No 39 Dili (Colmera Shoping Center) nia oin.

“Ironiku liu tan, ohin arguido nia deklarasaun ba Tribunál hatete katak, nia (arguido) la basa ha’u iha momentu ne’eba, oinsa atu prova se USB ne’ebé ha’u entrega Ministériu Públiku la sita iha despasu,” lezadu triste.

Hodi promete katak, iha julgamentu tuir mai nia sei husu ba Tribunál atu entrega hikas kopia video ne’ebé uluk entrega ona ba Ministériu Públiku ba iha parte juis.

Primeiru julgamento ba kazu jornalista, nu’udar vitima no membru polísia, nu’udar arguido preside hosi juis Maria Solana, Ministériu Reinato Bere Nahak, no Defensor Públiku Marsal Mascarenhas.

Prosesu Julgamentu ba parte daruak sei hahú fila fali iha loron 20 Juñu tuku 11:00.

To’o notisia ne’e tun parte TATOLI sei halo tentativa hodi konfirma ho parte Ministeriu Publiku.

(Ekipa Kobertura)  

HUSIK IDA HATÁN