iklan

NASIONÁL, INTERNASIONÁL

Vicky Kontenti Vizita Timor

Vicky Kontenti Vizita Timor

Vicky Nitinegoro, Atór filme Indonézia.

DILI (TATOLI)—Atór filme Indonézia, Vicky Nitinegoro, kontenti tebes mai vizita Timor-Leste tanba kapitál Timor nian, Dili, furak no hakmatek.

Prezensa Vicky iha Timor tanba hetan konvite hosi klube futeból Maudoko hodi mai halo joga amizade ho DIT FC iha Estádiu Munisipál Dili, sábadu semana kotuk. Maudoko FC nu´udar klube ne´ebé funda hodi timoroan sira ne´ebé eskola iha Indonézia hamutuk ho estudante sira hosi Indonézia.

Vicky nu´udar jogadór médiu hosi Maudoko FC. Iha jogu kontra DIT FC, Maudoko manán DIT ho golu 2-1. “Ha´u nia kolega sira hosi Maudoko FC iha Timor maka konvida ha´u mai Timor tanba ami kuñese malu bainhira halo jogu amizade iha Jakarta ne´abá,” nia haktuir ba jornalista sira iha Estádiu Munisipál Dili.

Nia informa katak ninia prezensa la´ós de´it hakarak vizita Timor maibé hakarak anima mós populasaun Timor liuhusi futeból. Nia to´o Timor iha sesta (16/6) no fila iha domingu (18/6). Antes sai atór filme, nia mós futebolista ida ne´ebé sempre joga hasoru klube sira seluk.

“Ha´u hadomi futeból dezde uluk kedas. Iha Jakarta ha´u iha klube rasik. Tanba ne´e, maske bele okupadu ba telenovela maibé rezerba tempu hodi joga bola,” Vicky esklarese.

Vicky moris iha Jakarta, 13 Jullu 1983. Nia hahú ninia kareira iha mundu arte nu´udar atór publisidade no atór telenovela. Telenovela ba dahuluk ne´ebé nia halimar maka Kisah Sedih di Hari Minggu, tuir mai Putri Cahaya, Cowok Impian, Ande-ande Lumut, Kau dan Aku, The Shaman (2007).

Aleinde atór telenovela, nia mós sai artista múzika hodi kanta hamutuk ho artista sira seluk hanesan Nicky Tirta, Ian Arya, Roger Danuarta, Dimas Seto, Dwi Andhika, Kiki Rizky, Rifky Abdullah, Gugun Gondrong no Atoy Herlambang. Ikus, nia halo album múzika hamutuk ho artista hirak ne´e ne´ebé lansa iha 14 Jullu 2007. Nia hahú involve ba telenovela iha 2003. (Jornalista: Xisto Freitas)

 

iklan
iklan

Leave a Reply

iklan
error: Content is protected !!