USAID asina akordu ho IBI estabelese Alfándega tuir padraun Internasionál

0
73
Ilustrasaun

DILI (TATOLI)—USAID-Timor-Leste asina ona akordu ho International Business Initiatives Corp. (IBI), atu hahú serbisu imediatamente ba projetu ho durasaun tinan tolu hodi fasilita funsionamentu alfándega ne’ebé efisiénsia no efikás liu tan  tuir padraun mundiál no aumenta reseita governu nian.

Diretora misaun USAID-Timor-Leste, Diana Putman hateten, USAID nia projetu foun alfándega ne’e dezeña atu asegura katak governu Timor-Leste bele tuir padraun globál ba funsionamentu alfándega.

“Nu’udar pré-kondisaun ida hodi adere ba Organizasaun Mundiál ba Komérsiu no Asosiasaun Nasaun sira Sudeste Aziátiku (ASEAN),” hateten Diana Putman, haktuir komunikadu USAID ba Ajénsia Tatoli, ohin.

Projetu ne’e sei haforsa governasaun autoridade alfándega foun, nu’udar instituisaun xave governu nia ida, ne’ebé sei kontribui hodi atinje objetivu husi Planu Reforma Fiskál Governu Timor-Leste nia.

Planu ne’e sei aumenta reseita liu husi hadi’a sistema, prosedimentu no pesoál ne ‘ebé di’ak liu.”Autoridade Alfándega ida ne’ebé mak profesionál no transparente mak hanesan odamatan ba prosperidade ba Timor-Leste,” nia akresenta.

Governu Timor-Leste liuhusi vise-ministru finansa, Helder Lopes agredese USAID ba kompromisu atu tulun ita hodi reforma ita-nia alfándega.

“Projetu tinan tolu ne’e sei ajuda hasa’e ita-nia reseita doméstika, fasilita komérsiu no haforsa ita-nia kapasidade institusionál atu atrai investimentu no diversifika ita nia ekonomia,” governante ne’e hateten.

Projetu alfándega – USAID/Timor-Leste nia atividade aumenta rendimentu ba governasaun di’ak. Implementa atu ajuda Timor-Leste haforsa demokrasia no governasaun.

Tuir projetu nia dezeñu, IBI sei haforsa kapasidade institusionál no umanu ba autoridade alfándega, atu nune’e alfándega bele tuir prátika di’ak komérsiu nian iha nível globál no rejionál, espesifikamente tuir Enkuadramentu Padraun Organizasaun Mundiál Alfándega 2005 hodi asegura no Fasilita Komérsiu Globál.

Nune’e mós, Revizaun Deklarasaun Arusha 2003 kona-ba governasaun di’ak no integridade iha alfándega no komponente komérsiu husi  ASEAN nia akordu kona-ba Komérsiu iha área Bens.

Hadi’a funsionamentu alfándega mós sei ajuda aselera kreximentu ekonómiku no investimentu liuhusi hamenus kustu ba komérsiu no habadak prosesu despaxu alfándega nian.

USAID serbisu besik ho governu no povu Timor-Leste nian, hodi promove kreximentu ekonómiku ne’ebé inkluzivu no sustentável, espesiálmente iha setór agrikultura nian no enkoraja kompetitividade setór privadu.

Inklui, rezolve dezafiu saúde ne’ebé sériu, liu-liu hirak ne’ebé afeta  feto no labarik, haforsa instituisaun demokrátiku sub-nasionál no fundasaun ba governasaun di’ak, proteje ambiente no ajuda populasaun ne’ebé iha risku atu adapta mudansa klimátiku.

Entretantu, tuir planu, projetu ne’e sei remata iha maiu 2020.

(Jornalista: Rafy Belo)

(Editór : Manuel Pinto)

 

HUSIK IDA HATÁN