UNTL-UNITAL-Vikeke sai manán na’in Karavana Artístika 2017

0
63
Foto TATOLI

DILI (TATOLI)– Universidade Nasionál Timor Lorosa’e (UNTL), Universidade Orientál Dili (UNITAL), no Munisípiu Vikeke sai nu’udar manán na’in dahuluk ba kategoria tolu iha eventu Karavana Artístika 2017 ho tema  “Haburas no Dezenvolve Rai Doben Timor-Leste ne’ebé organiza husi Ministériu Turizmu, Arte no Kultura (MTAK).

UNTL nu’udar primeiru lugar iha klasifikasaun sosiedade sivíl kulturál orijinál ho valór 2940 no hetan prémiu U$2500. UNITAL sai manán na’in ba kategoria sosiedade sivíl modernu ne’ebé iha valór 2595 ho prémiu U$2000 no Vikeke sai vensedór iha klasifikasaun munisípiu nian ho valór 2565 no prémiu U$2000.

Aleinde ne’e, klasifikasaun kultura orijinál favóritu ho valór 2135 mak Kultura CSMA ho osan U$500 no sestu lugar monu ba grupu Kolisina Malae ho totál 2275, prémiu osan U$600, kintu lugar monu ba Sacorjus ho totál 2335 no prémiu U$700, kuartu lugar monu ba Sanggar Matan ho totál  2340 no osan U$800.

Prezidenti ekipa júri, Orlandina  Cairo iha kalan finál ba eventu ne’e fó sai katak  terseiru klasifikasaun sosiedade sivíl modernu monu ba LTC ho prémiu osan U$1000 no Floresta da Montanha sai segundu lugar ho osan U$1500.

“Klasifikasaun kultura orijinál iha terseiru lugar monu ba Tane Kultura ho valór osan U$1500. Tuirmai iha segundu lugar mak DIT ho valór osan U$2000”, Orlandina hato’o horiseik kalan.

Kategoria ba munisípiu sira no sai nu’udar sestu lugar monu ba munisípiu Dili ho osan dólar U$500, kintu lugar munisípiu Baukau iha prémiu osan dólar U$600, kuartu lugar monu ba munisípiu Manatutu ho prémiu osan dólar U$700.

“Sai hanesan terseiru lugar ba klasifikasaun munisípiu monu ba munisípiu Lautein ho osan U$1000 no segundu klasifikasaun munisípiu Aileu ho prémiu U$1500 no favóritu husi munisípiu ne’ebé hetan prémiu dólar U$500 mak Bobonaru”, Jeca Smith hanesan ekipa júri dehan.

Ba grupu sira ne’ebé la manán, Prezidente Júri husu atu prepara aan didi’ak bainhira iha tinan 2018 mak organiza atividade  ne’e, sira mós bele sai manán na’in.

(Jornalista: Maria Auxiliadora)

(Editór : Manuel Pinto)

HUSIK IDA HATÁN