UE Ko-Finansia Millaun 5 Iha Projetu SP/PALOP-TL

0
68
Reprezentante UE ba Timor-Leste, Simon Le Grand bainhira halo intervensaun hamutuk ho autoridade relevante sira iha lansamentu formasaun planeamentu estratéjiku governu elektróniku no jestaun projetu teknolojia informasaun. Foto Tatoli: Egas Soares

DILI, (TATOLI)-Uniaun Europeia (UE) liuhusi Fundu Europeu ba Dezenvolvimentu da-sanulu ko-finansia (la’ós UE mesak apoiú) euro milaun lima ho Instituto Camões, institutu kooperasaun no língua ko-finansia milaun ida ba projetu Serbisu Públiku (SP/PALOP-TL).

Dadus ne’e informa husi reprezentante EU ba Timor-Leste, Simon Le Grand iha Diresaun Nasionál Registu no Notariadu, Colmera, Dili, ohin bainhira partisipa iha lansamentu Estratéjiku E-Gov no Jestaun ba projetu iha teknolojia informasaun no komunikasaun (TIK).

Objetivu SP/PALOP-TL mak kontribui ba servisu públiku hodi bele sai kualidade no iha asebilidade ba sidadaun no empreza sira liuhusi melloria funsionamentu administrasaun públika. Ba PALOP no Timor-Leste iha nível nasionál no lokál iha tempu ohin loron nian.

Aposta iha modernizasaun instituisaun sira nian fundamentál hodi hala’o kompetividade iha ekonomia no dezenvolvimentu sosiál.

Modernizasaun administrasaun públika liuhusi informatizasaun servisu públiku hamosu vantajen oioin, lais liu no iha efisiénsia no efikásia.

Nune’e mos iha prestasun serbisu ba sidadaun no empreza sira potensiál redusaun kustu liuhusi utilizasaun teknolojia foun.

So nune’e mak Timor sei iha transparánsia iha asaun governativa no governasaun di’ak alias nu’udar mós setór xave Uniaun Europeia nian iha Timor-Leste.

“Milaun 30 mak prevista hodi halo intervensaun ba área ida ne’e,”  informa reprezentante EU, Simon Le Grand.

No reforsa hikas, envolvimentu funsionáriu públiku mak fundamentál iha implementasaun ba área relevante ne’e.

“Ha’u hein katak ho kompeténsia foun bele aplika no iha impaktu ba serbisu sira iha futuru,” nia konklui hodi refere ba formandu ba formasaun Estratéjiku E-Gov no Jestaun ba projetu iha teknolojia informasaun no komunikasaun (TIK) ne’ebé hala’o hahú ohin. (Jornalista: Rafy Belo, Editor : Manuel Pinto)

 

HUSIK IDA HATÁN