TT introdus tan servisu 4G LTE ba internet

0
137
4G LTE. Foto/Google

DILI (TATOLI) – Diretór Jurídiku no Relasaun Institusionais Timor Telecom (TT), Manuel Cárceres da Costa hateten rajaun prinsipál TT atu introdus servisu 4G LTE (Fourth Generation Long Term Evolution), tamba hakarak lori inovasaun ba teknolojia servisu sistema informasaun mai Timor-Leste (TL).

“Rajaun prinsipál Timor-Telecom halo investimentu ida atu introdus servisu 4G LTE nian, tamba hakarak lori inovasaun ba teknolojia servisu sistema informasaun mai Timor-Leste no atu atualiza servisu 3G ba 4G,” Manuel Cárceres da Costa tenik ba Ajensia TATOLI iha nia k’nar fatin iha Timor Plaza pizu 4, Segunda (5/6).

Hodi hatutan, Díli iha 200,000 resin telemóvel mak iha asesu ba internet, entaun asesu internet ba rede 3G ne’e todan demais no presiza avansa tan ba oin no introdus servisu foun atu hasae kapasidade 3G.

Iha fulan tolu liu ba TT halo teste ba servisu 4G, teste sira durante ne’e la’o ho diak no komesa loron 1 Junhu TT halo lansamentu ba públiku. TT mós informa ona ba Autoridade Nasionál komunikasaun (ANC – Autoridade nacional Comunicação) katak prontu ona atu halo lansamentu­ servisu 4G ba kliente sira maibé faze dahuluk ba sidade Díli deit.

Nune’e nia apela ba kliente sira ne’ebé atu hetan servisu 4G, bele lori kartaun ba loja TT atu hetan segunda via ho númeru hanesan no kartaun ne’ebé atualiza ona ba servisu 4G. Telemóvel ne’ebé uza mós tenke iha asesu ba servisu 4G.

“kartaun sidauk atualiza labele uza servisu 4G no antes atu atualiza kliente sira tenke halo backup númeru kontaktu iha telemovél hodi númeru sira labele lakon”, esplika.

Entretantu nia fó hanoin, enkuantu servisu 4G halo velosidade asesu internet aumenta, kustu mós aumenta, nune’e TT mantein ho pakote ne’ebé iha tamba sei hare ba adezaun klientes ba servisu ne’e hafoin halo programa ba pakote sira.

(Jornalista: Julia Chatarina)

(Editór : Manuel Pinto)

HUSIK IDA HATÁN