Tribunál Absolve Jornalista Oki-Lorenço

0
300
Raimundo Oki ho Lorenço Vicenti Martins tur hein desijaun. FOTO TATOLI

DILI, (TATOLI) – Tribunál Distritál Dili liuhosi julgamentu ne’ebé prezide hosi juiz singulár, Patrocinio Antonino, kinta, (1/6) deside absolve jornalista Raimundo Oki ho Lorenço Vicente Martins hasoru eis asesór Ministériu Finansas, Rui Maria de Araújo (atuál Primeiru Ministru) tanba konsidera akuzasaun Ministériu Públiku la-priense elementu krime denúnzia kalunioza artigu 285 kodigu penál.

Juiz Patrocinio Antonino deklara, hafoin estuda kazu, tribunál prova katak, Lorenço Vicente Martins nu’udar diretór jornal Timor-Post (momentu públikasaun) no Raimundo Oki nu’udar jornalista Timor-Post iha kazu públikasaun notísia Timor Post ne’ebé konsidera erru hatudu katak iha duni tentativa hodi konfirma no prova katak Timor-Post halo koresaun.

Enkuanto akuzasaun Ministériu Públiku (MP) inklui lezadu Rui Maria de Araújo la aprejenta faktu sufisiente hodi kondena Raimundo Oki no Lorenço Martins ho krime denúnzia kalunioza ne’ebé hatete arguidu sira halo ho konsénsia no nia aplikasaun ba kastigu tinan rua ou multa.       

“Tribunál konsidera akuzasaun Ministériu Públiku la priense elementu krime tuir artigu 285 kodigu penál katak, arguidu sira iha konsénsia hodi halo públikasaun falsa, laiha dokumentu ruma bele prova tanba ne’e tribunál deside absolve”, deside.

No husu ba parte sira ne’ebé iha interese ba kazu ne’e hanesan ministériu públiku ho advogadu arguidu sira nia bainhira la konkorda ho desizaun bele halo rekursu tuir lei haruka.

Desizaun ne’e halo jornalista atus ida resin ne’ebé mak akompaña prosesu hodi fó solidaridade ba jornalista Raimundo Oki ho Lorenço Vicente Martins hosi nasionál tantu internasionál basa liman ba desizaun no hahú fó parabens ba malu liu-liu fó parabens ba arguidu nain rua.

Iha fatin hanesan antes hahú julgamentu juiz Patrocinio Antonino, klarifika mós ba públiku katak, kazu jornalista nain rua nian ho eis asesór ne’e tuir loloos lezadu labele haruka karta hanesan iha loron 30 maiu ba tribunál bazeia ba étika tribunál nian.

“Haruka karta mai orsida públiku bele konsidera desizaun ne’ebé tribunál hola tanba bazeia ba karta lezadu, ne’e tuir etika labele”, lamenta juiz Ivan.

No husu atu públiku hatene katak tribunál hola desizaun ba kazu ne’e la-halo tuir lezadu nia hakarak.

Entertantu nu’udar juiz ba prosesu NUC :0112/16.PNSIC mak juiz Patrocinio Antonino rasik, parte Ministériu Públiku, Lidia Soares no advogadu ba arguidu mak, José Camoes ho Arlindo Sanches.

(Ekipa Redasaun)

 

HUSIK IDA HATÁN