Timor-Leste Sei Selebra Loron Nasionál Saúde

0
61
Foto espesial

DILI, (TATOLI) – Normalmente Timor-Leste komemora loron mundiál saúde maibé bazeia ba rezolusaun governu númeru 6/2017, 8 fevereiru termina loron 22 jullu sai hanesan loron nasionál saúde atu selebra.

“Timor-Leste sempre komemora loron mundiál sira maibé governu liuhosi ministeriu saúde (MS) sei selebra loron nasionál saúde nu’udar komemorasaun dahuluk iha área saúde nian”, informa Diretora Prestasaun Servisu MS, Odete Viegas  ba jornalista sira iha salaun MS, Kaikoli, kinta (29/6).

Selebrasaun loron nasionál saúde ho tema “lori saùde ba uma kain ida-idak no lori povu ba moris di’ak” ho tópiku ne’e refleta kondisaun moris (Life Style) hanesan moras kurasaun, tensaun no seluk tan, moras sira oioin tanba kondisaun moris ba ema ne’ebé moris ho ekonomia médiu no la’os ba ema kiak sira.

“Moras sira ne’e akontese tanba estilu moris ho hahalok moris iha mudansa ne’ebé rezulta ema ekonomia nivél médiu bele muda moris ho afeta moras”, esplika.

Nia hatutan, loron nasionál saúde sei hahú iha 3 to’o 29 jullu ho atividade sira hanesan chek up, doasaun ran, semináriu siéntifiku ba promosaun saúde edukativa desportiva, atribui premiu ba profesionál saúde no seluk tan.

Maske nune’e, loron nasionál saúde iha 22 jullu ne’ebé sei soke malu ho eleisaun lejislativa, nune’e iha dia 29 mak sai nu’udar selebrasaun íntimu ba loron importante ne’e.

Atividade sira ne’e akontese iha Timor laran tomak tanba ko’alia saúde la’os ko’alia ema ida de’it nian, nune’e munisípiu hotu liuhosi sentru saúde bele organiza programa sira ne’e hodi dizemina informasaun liuhosi promosaun saúde edukativa ba públiku.

Jornalista: Zezito Silva

Editora: Rita Almeida

HUSIK IDA HATÁN