Timor-Leste Komprometidu Manten Relasaun ho Portugal

0
83
Á Vise-ministru Roberto Soares durante sorumutu ho nia omológa portugeza, Teresa Ribeiro iha Portugal. Foto: MNEK

DILI (TATOLI)—Vise-ministru Negósiu Estranjeiru no Kooperasaun, Roberto Soares  afirma, Timor-Leste komprometidu hametin relasaun bilaterál ho nasaun belun Portugal, maske iha mudansa iha governu Timor-Leste kada tinan lima-lima.

“Vizita iha Portugal mós atu manifesta nafatin Timor-Leste ninia kompromisu hodi kontinua hametin relasaun bilaterál ho país irmaun Portugal,” haktuir komunikadu ne’ebé Ministériu Negósiu Estranjeiru no Kooperasaun diriji mai ajénsia Tatoli, ohin hodi informa kona-ba ninia vizita traballu durante loron tolu iha Portugal.

Sekretaria Estadu Negosius Estrangeirus no Kooperasaun Portugal, Teresa Ribeiro hateten, Timor-Leste nu’udar nasaun espesiál ba Portugal tanba ne’e governu no estadu portugés prontu nafatin apoiu dezenvolvimentu Timor-Leste.

“Timor-Leste nafatin sai hanesan país ida ne’ebé espesiál no importante iha Portugal nia pulítika no Portugal prontu nafatin atu fo asisténsia ba Timor-Leste ninia prosesu dezenvolvementu tomak,” hateten sekretáriu estadu.

Durante sorumutu ho nia homóloga, vise-ministru Roberto informa kona-ba eleisaun Parlamentar ne’ebé atu mai no realsa katak komprimisu relasaun entre Timor-Leste no Portugal nafatin manten.

“Bele mosu mudansa iha governu, maibé Timor-Leste nia polítika no kompromisu ba relasaun ho Portugal sei la muda”, afirma governante ne’e.

Alén de troka hanoin kona-ba relasaun bilaterál, vise-ministru ho ninia homóloga mós partilla hanoin kona-ba Timor-Leste ho Portugal nia papel iha ONU (Organizasaun Nasaun Unida), CPLP (Comunidade dos Países da Língua Portuguesa), Portugal iha Uniaun Europeia, PALOPs (Países Africanos da Língua Oficial Português).

Nune’e mós, Timor-Leste nia adezaun ba ASEAN (Association of South East Asean Nation), Timor-Leste nia papel iha g7plus, Forum Illas Pasífikas no ko’alia mós kona-ba konjuntura polítika no seguransa iha rejiaun no mundu.

Vizita traballu ne’ebé vise-ministru ho nia komitiva hala’o ba Portugal ne’e durante loron tolu, hahú tersa (27/05) ne’e, iha biban hasoru malu mós Ministru Edukasaun Portugal nian, Tiago Brandão Rodrigues hodi informa mós kona-ba konferensia nasionál ba edukasaun ne’ebé foin dadaun realiza iha Timor-Leste.

Konferénsia ne’ebé toka mós kona-ba maka kestaun língua portugeza hodi sai nu’udar tema prinsipál ida ba konferensista sira hodi diskute.

Tuir mai, komitiva kontinua ba partisipa iha serimónia asinatura Protokolu entre Organizasaun g7plus ho Kámara Munisipál Lizboa nian hodi estabelese filiál g7plus ida iha kontinente europeu ho sede iha sidade Lizboa.

(Jornalista: Rafy Belo)

(Editór : Manuel Pinto)

HUSIK IDA HATÁN