Timor-Leste Deporta ona Fujitivu POLRI

0
325
Prosesu deportasaun fujitivu POLRI iha aeroportu internasionál Nicolau Lobato, Komoro, ohin. Foto Tatoli/António Goncalves

DILI, (TATOLI) – Timor-Leste liuhosi polísia imigrasaun entrega ona fujitivu estranjeiru nain rua ba Polísia Repúblika Indonézia (POLRI) hafoin Prokuradoria Jerál Repúblika (PJR) fó orientasaun.

Prosesu deportasaun fujitivu POLRI iha aeroportu internasionál Nicolau Lobato, Komoro, ohin. Foto Tatoli/António Goncalves

“Ohin, desizaun hosi Tribunál Distritál Dili (TDD) fó ona pena prizaun preventiva ba fujitivu nain rua, maibé ami koordena ho Prokuradoria Jerál Repúblika (PJR) dehan katak loos duni tanba prizioneiru nain rua halai sai hosi prizaun Bali, nune’e desizaun tribunál foti hafoin ita deporta”, informa Komandate Jerál Polísia Nasionál Timor-Leste, Júlio da Costa Hornai liuhosi konferénsia imprensa iha Aeroportu Internasionál Nicolau Lobato, sabadu (24/6).

Nia reforsa, prosesu julgamentu finál ohin tuku 10:00 dader iha TDD akompaña hosi Ministériu Públiku no Prokuradoria Jerál Repúblika hafoin fó orientasaun atu entrega ba POLRI, nune’e ezekuta prosesu ba sidadaun Bulgaria, Dimitar Nikolov Iliev ho tinan 43 no sidadaun India, Sayed Mohammed Said ho tinan 31.

“Ami Polisia Nasionál Timor-Leste (PNTL) submete fujitivu nain rua ne’e ba imigrasaun hafoin sira prosesa hodi entrega ba POLRI, hafoin sira ba ezekuta tanba nain rua halai sai hosi prizaun Bali”, dehan nia.

Enkuantu, Inspetór Jerál Polísia, Petrus Golose ho ekipa hamutuk 17 to’o iha Aeroportu Internasionál Nicolau Lobato horseik tuku 14:00 ho aviaun privadu atu mai simu fujitivu sira ne’e maibé  la konsege tanba sei tuir prosesu judisiariu. Maske nune’e, ohin orientasaun hosi PJR permite atu entrega liuhosi imigrasaun ba POLRI no simu direita hosi Petrus Glose ho nia ekipa hafoin aranka ba Indonézia tuku 13:40.

Entretantu, tuir kronolojia hosi PNTL liuhosi Servisu Investigasaun Kriminál (SIK) ho Unidade Polísia Marítima (UPM) katak, fujitivu POLRI nain rua ne’e hetan kaer bainhira tama liuhosi Portu Dili ho illegal.

Asaun ne’e polísia halo tanba hetan informasaun hosi POLRI katak prizioneiru rua ne’e halai hamutuk ho nain rua seluk hosi prizaun Kerobokan Badung-Bali, Indonézia iha segunda (19/6) tuku 7:30 oras Bali nian.

Sira nain haat mak hanesan Shaun Edward Davidson alias Eddie Lonsdale alian Michael Jhon Bayman Bin Eddi (33), sidadaun Austrália, Dimitar Nikolov Iliev (43), sidadaun Bulgaria, Sayed Mohammed Said (31) sidadaun India, no Tee Kk King Bin Tee Kim Sai (50) sidadaun Malázia.

Prizioneiru nain haat ne’e deskonfia halai sai hosi prizaun ho maneira ké rai halo kuak hafoin tama tuir kuak no hanesan valeta atu to’o iha estrada Merthanadi, Kerobokan Badung, Bali.

Jornalista: Zezito Silva

Editora: Rita Almeida

HUSIK IDA HATÁN