Tempu Besik ME Sosializa Dekretu Ne’ebé Regula Profesór Sira

0
187
Vise-ministra Edukasaun, Dulce de Jesus Soares

DILI, (TATOLI) – Vise-ministra Edukasaun I, Dulce de Jesus Soares hateten semana oin ninia parte sei halo sosializasaun kona-ba dekretu lei ne’ebé regula profesór sira iha prosesu aprendizajen.

Dekretu governu ne’e sei aplika ba eskola sira. “Ami hein katak iha semana oin, sei hala’o sozializasaun no sei aplika iha eskola sira”, hatan ba ajénsia Tatoli iha ótel Timor, kuarta (7/6).

Dekretu ne’e reforsa mós implementasaun dekretu lei ministériu edukasaun. “La’ós durante ne’e laiha regra maibé prezensa dekretu governu ne’e atu reforsa liutan implementasaun dekretu lei sira ne’ebé iha ona”, reforsa.

Ministra ne’e fó ezemplu katak kazu abuzu ruma akontese ba estudante ida iha eskola, diretór eskola se la’e profesór relata ba inspetór eskola.

Tuir mai, inspetór haruka ba superintende, superintende haruka ba inspesaun jerál depois haruka ba membru governu hanesan ministru ka vise, depois enkamiña ba Komisaun Funsaun Públika (KFP) atu foti medida ba profesor ne’e.

“Maibé ho dekretu governu ida ne’e atu halo lais liutan hodi define, karik iha kazu ruma hanesan auto flagrante delito (kaer toman) mak se de’it mak hetan abuzu seksuál, nia bele keisa diretamente ba polísia, ne’e mak forsa husi dekretu ne’e”, esplika.

Kuandu kazu ne’ebé grave, inspetór eskola sira halo apuramentu informasaun, maibé kazu kmaan, diretór ka adjunta eskola rejistu, nune’e enkamiña ba KFP hodi halais prosesu.

Tanba ne’e, nia espera mídia bele apoiu halo diseminasaun kona-ba dekretu ne’e. “Ajuda ami hodi bele desimina lei ida ne’e tanba dala ida tan katak ita-nia eskola sira ne’e barak liu mak iha área remota”, realsa.

Nia hatutan, ninia parte laiha forsa, fasilidade atu tuun no haree direta profesór sira katak hanorin tuir métodu no oráriu. “Profesór sira tama duni eskola ka lae, hanorin husi tuku ualu to’o tuku 12.00 ka lae, halo tuir planu ka prepara planu lisaun ka lae”, akresenta.

Hirak ne’e tanba ministériu iha inspetór maibé la kobre eskola sira hotu ka eskola lorloron. “Ita mós iha superintendente ida de’it iha nível nasionál, inspesaun jerál ho ninia funsionáriu sira iha nível nasionál”, informa.

Governante ne’e dehan, dekretu ne’e, fó kna’ar ba Gabinete Diretivu Eskola, Adjuntu Apoiu Tékniku ho profesór sira, ho Associação dos País atu tau-matan.

Notísia relevante: http://www.tatoli.tl/2017/06/governu-aprova-dekretu-lei-regula-profesor/

Jornalista: Rafy Belo

Editora: Rita Almeida

HUSIK IDA HATÁN