Tempu Besik Sei Harii Rede Parlamentu Juventude CPLP

0
83
Komitiva estrutura CNJTL hamutuk ho Sekretáriu Estadu Juventude no Desportu, Leovigildo Hornai, hasai foto hamutuk ho Prezidenti Repúblika, Dr. Francisco Guterres Lú-Olo, hafoin ramata inkontru. Imajen Mídia Palásiu PR.

DILI (TATOLI)—Konsellu Nasionál Juventude Timor-Leste (CNJTL) iha planu atu harii Rede Parlamentu Juventude CPLP (Comunidade País da Língua Portuguesa) iha tempu badak ho objetivu atu akumula juventude nasaun membru CPLP.

 “Tenkiser iha instrumentu ida (konvivénsia) ba juventude para bele akumula sira. Presiza akumula juventude hotu-hotu nia hanoin no ninia diferensa maibé hamutuk iha ida de´it katak tenki simu malu ba interese nasionál. Rede refere parte ida atu aegura ida ne´e,” Sekretáriu Jerál CNJTL, Luis Mendes Ribeiro ko´alia asuntu ne´e ba jornalista sira iha Palásiu Prezidénsia Repúblika, Bairu-Pité, Dili, sesta ne´e, hafoin nia ho nia komitiva inklui Sekretáriu Estadu Juventude no Desportu, Leovigildo Hornai, konsulta kriasaun rede refere ba Xefi Estadu Dr. Francisco Guterres Lú-Olo.

Luis informa prosesu kriasaun ba Rede Parlamentu Juventude CPLP oras ne´e la´o hela. Iha Jullu tinan ida ne´e, nia tenik, komitiva CNJTL sei ba partisipa inkontru juventude CPLP iha Lisboa no iha oportunidade ne´e Sekretariadu Forum Juvetude CPLP sei halo negosiasaun ho Konsellu Nasionál Juventude hosi nasaun seluk iha CPLP atu harii rede ne´e.

Nia haktuir katak Prezidenti Repúblika apoiu inisiativa CNJTL hodi kria Rede Parlamentu Juventude CPLP tanba CNJTL iha papél importante atu apoiu ba Estadu hodi asegura estabilidade no unidade nasionál. “Tanba ne´e maka ohin ita konsulta buat rua ba prezidenti maka hanesan oinsá fó apoiu baze legál no asisténsia finanseiru para prosesa ida ne´e to´o iha estabelesementu,” Luis afirma. (Jornalista: Xisto Freitas)

HUSIK IDA HATÁN