Sujeitu Justisa Ida ou Tolu ba Autór Notísia Defamasaun Dr. Rui Maria de Araújo?

0
75
Foto google

DILI, (TATOLI) – Loron 1 fulan Juñu 2017 Tribunál Distritál Dili (TDD) sei halo julgamentu ikus hodi rona desizaun finál ba kazu defamasaun Dr. Rui Maria de Araújo ne’ebé públika iha Timor Post tinan 2015.

Parte ministériu públiku iha alegasaun finál, atu  journalista ne’ebé produs notísia iha diáriu Timor Post ho naran Raimundo Oki, prizaun durante tinan ida tanba konsidera kontra artigu  285 lei kodigu penál ne’ebé ko’alia kona-ba denunzia kalunioza.

Segunda loron 29 Maiu 2017 kuaze journalista Timor Leste halo asaun solidariedade silensio hahú hosi edifisiu Timor Post hodi ba kari aifunan iha tasi ibun palásiu governu nia oin, hanesan asaun solidariedade ba jornalista Raimundo Oki ne’ebé atu tama prizaun tinan ida.

Iha loron 30 Maiu 2017 Ajénsia Notísia Timor Leste, Tatoli públika, Dr Rui Maria de Araújo hanesan pesoál no sidadaun Timor Leste haruka ona karta ba Tribunál no husu atu Tribunál  estuda kle’an liu konaba lia loos hosi kazu publikasaun Timor Post. Ba parte Tribunál, Rui hatete, nia la husu atu halo tratamentu espesiál ou halo intervensaun ba Tribunál, maibe nia husu atu Tribunál bele hatudu lia loos hosi publikasaun Timor Post ne’ebé  konsidera defama ona ninia naran iha públiku.

Sekretariu Estadu Komunikasaun Sosiál, Nélio Isaac Sarmento  iha Tersa 30 Maiu 2017 kalan hatete, bainhira parte Tribunál Dili simu buat ne’ebé Dr. Rui husu, signifika Tribunál tuir loloos hatun ona sansaun ba Timor Post atu bele públika hodi husu deskulpa ba Rui Maria de Araújo durante fulan ida iha pajina oin. Nune’e mós tenke fó sansaun ba Raimundo Oki no Lorenço Martins labele  hala’o atividade jornalístiku durante fulan neen ou tinan ida. Maibé, Dr.Rui Maria de Araújo  husu de’it ba Tribunál atu hatudu lia-loss hosi notísia Raimundo Oki ne’ebé públika iha diáriu Timor Post.

Julgamentu Tribunál hosi kazu defamasaun Dr. Rui Maria de Araújo hahú hosi notísia ne’ebé hakerek hosi Raimundo Oki, publikasaun ne’e hetan aprovasaun hosi parte Xefe Redasaun Diáriu Timor Post, Santina da Costa Araújo ho koñesimentu Diretór Timor Post, Lorenço Martins bele konsidera hanesan  “indikatór” ne’ebé mosu hanesan faktu justisa oioin, durante julgamentu ba kazu ne’e.

Lala’ok justisa ne’e labele  interven ba desizaun hosi Juiz no Tribunál Dili, maibé hanesan hanoin krítiku – analitiku hosi aspetu esensiál juridiku no justisa nian.

Faktu balun ne’ebé bele halo identifikasaun durante julgamentu kazu defamasaun ba Dr Rui Maria de Araújo maka tuir loloos sai materia prinsipál ba desizaun Tribunál maka: dahuluk, sujeitu justisa no mos parte sira ne’ebé konsidera hanesan “suspeitu” iha kazu defamasaun ne’e la ké kle’an liu hodi dezenvolve. Faktu justisa maka Raimundo Oki de’it mak kona kazu justisa. Indikadór, prokuradór akuza de’it Raimundo Oki ho prizaun durante tinan ida, entertantu justisa la-kona sujeitu no mos suspeitu justisa ba kazu defamasaun totál.

Daruak, analiza justisa maka, oinsá Raimundo Oki bele halo hahalok defamasaun ba Dr. Rui Maria de Araújo sem públika iha diáriu Timor Post. Pergunta krítiku seluk ne’ebé la dezenvolve iha prosesu julgamentu: tanbasa, Xefe Redasaun diáriu Timor Post, Santina da Costa Araújo hanesan parte ne’ebé iha responsabilidade másimu tanba foti desizaun hodi hatun notísia  hosi ninia jornalista ho naran Raimundo Oki, hetok la temi hanesan sujeitu justisa no sujeitu prinsipál ou ‘korente’ hosi kazu defamasaun ne’e? nia livre hosi justisa liuliu akuzasaun ministériu públiku.

Datoluk, tanbasá, Lorenço Martins ne’ebé mosu iha Tribunál hanesan Diretór no nain ba Timor Post, bele livre hosi justisa no akuzasaun ministériu públiku, afinal nia rekoñese ema nia sala ne’ebé akontese relasiona ho notísia Timor Post ne’ebé defama ona Dr Rui Maria de Araújo? nia maka husu deskulpa hanesan superior no reprejenta na’in ba mídia Timor Post ba erru hosi ninia jornalista ne’ebé ladun profesional, no hateten katak Timor Post sei halo koresaun kauza hosi erru  publikasaun ne’ebé rezulta defamasaun.

Se de’it labele halo intervensaun no influensia desizaun Tribunál Distrital Dili iha kazu dafamasaun Dr Rui Maria de Araújo. Dr Rui Maria de Araújo husu de’it atu Tribunál hatudu lialoos ba publikasaun kazu defamasaun iha Timor Post.

Dr Rui Maria de Araújo husu ne’e tuir loloos sai ona faktu justisa antes no durante julgamentu, litígio bele halo rezumu ho komponente: dahuluk, loos duni  iha faktu notísia defamasaun ne’ebé halo hosi Raimundo Oki iha diáriu  Timor Post ne’e laloos no sala.

Daruak, katak loos duni notísia ne’ebé ladun kompletu no sala, hadi’a ona hosi Timor Post kompleta ho koresaun no husu diskulpa iha loron…. datoluk, loos duni katak iha ne’eba deskobre faktu katak publikasaun Timor Post ne’ebé ho karater defamasaun ne’e halo ona defamasaun ba Dr Rui Maria de Araújo hanesan faktu ne’ebé sai mos preokupasaun hosi grupu   Global Media kompostu hosi the International Federation of Journalist (IFJ), the South East Asia Journalist Unions (SEAJOU), the Committee to Protect Journalist (CPJ) no Freedom House  no antes ne’e parte SEAPA (South East Asia Press Alliance) no Global Voices mos hetan ameasa no la-hetan liberdade imprensa atu transmite notísia korrupsaun ne’ebé Estadu Timor Leste halo.

Desizaun saida de’it hosi juiz Tribunál Distrital Dili alende iha kapasidade atu haktuir lia loos tenke iha ninia valór justisa no sentimentu arrepende ba hahalok sira liuba.

Tribunál bele livre atu temi faktu sira justisa nian ba kazu defamasaun. Tanba kazu ne’e imposivel Raimundo Oki mesak halo maibé presiza desizaun ba publikasaun hosi Redasaun hanesan mos responsavel hosi konteudu notísia. No notísia/informasaun ne’ebé defama ona naran presiza mídia atu públiku bele hatene, ho kontestu ne’e Timor Post maka mídia ida ne’ebé Raimundo Oki uza hodi halo defamasaun ba Dr Rui Maria de Araújo.

Nune’e, iha autór nain tolu ba kazu defamasaun Dr Rui Maria de Araújo maka, Raimundo Oki, Santina da Costa Araújo no Diáriu Timor Post. Oinsá juiz sei foti desizaun hodi lori autór defamasaun ne’e ba kadeia? ita mos seidauk hatene.

Oinsá sentimentu justisa konsidera katak ida ne’e reprezenta ona iha desizaun kadeia hosi tribunál ne’ebé deside Raimundo Oki no Santina Araújo labele hala’o atividade jurnalistiku durante tinan tolu atu bele kompleta sira nia sentimentu arrepende (la-halo tan sala ne’ebé hanesan)? oinsá sansaun obrigatoriu ne’ebé hudi husu deskulpa tokon ba tokon hosi Timor Post bele konsidera reprezenta ona sentimentu justisa ba vitima defamasaun ? ou sansaun indeminizasaun US$ mínimu juta lima tenke selu hosi Timor Post hanesan hatuur didiak fila fali Dr Rui Maria de Araújo ninia naran hosi defamasaun ne’e?

Ekipa Redasaun

HUSIK IDA HATÁN