Sucufindo Indonézia Sei Apoia AIFAESA

0
62
AIFAESA ho Sucufindo asina akordu, ohin. Foto Tatoli/Egas Cristovao

DILI, (TATOLI) – Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) halo akordu ho Sucufindo, PT Superintending  Company of Indonesia (Persero) atu fó apoia iha parte laboratóriu.

Memorandu entendimentu ne’ebé ohin asina inklui formasaun ba funsionáriu AIFAESA ne’ebé sei hala’o iha Indonézia nomós iha Timor-Leste, depende ba orsamentu AIFAESA no nia vantajen sira.

“Aproveita tanba Indonézia rai besik no ita-nia intelektuál sira komprende lian, ne’e mak ami haree katak Indonézia importante no ita hetan instituisaun hanesan Sucufindo bele fó apoiu iha formasaun ba laboratóriu no seluk tan”, Koordenadór AIFAESA, Abílio Oliveira hatete iha Matadouru, ohin.

Abílio hatutan durasaun akordu mínimu tinan ida ka rua ne’e importante tebes, depende ba nesesidade. Ho apoiu Sucufindo, AIFAESA bele halo servisu di’ak liután.

Antes kooperasaun estabeles, AIFAESA halo ona komunikasaun ho Sucufindo dezde estrutura Inspesaun Alimentár Ekonómika (IAE) tanba sira hanesan órgaun importante iha Indonézia no halo kobertura ba sasán lubuk ida kona-ba laboratóriu, meterolojia.

Inísiu janeiru 2017 AIFAESA halo inspesaun ba atividade ekonómika, eseptu jogu sira no mina.

Vise Prezidente Corporate Business Developmet Sucufindo, A. Iskandar K. hatutan prezensa ne’e hanesan esforsu atu dezenvolve unidade no sinerjia ho AIFAESA, katak laboratóriu ne’e ba oin iha papél ne’ebé importante no estratéjia ba nasaun.

“Nivel sosa no hahán ne’ebé sirkula iha Timor-Leste tenke kumpri estandarte ne’ebé aplika husi Governu Timor-Leste, internasionál hanaran complyens, eskema sei dezenvolve husi Estadu Timor-Leste no tenke teste husi laboratóriu.

Daudaun ne’e AIFAESA iha ona planu estratéjiku atu dezenvolve laboratóriu, relasiona ho hahán tanba kuaze porsentu 80 hahán importasaun no tenke iha serteza katak di’ak no laiha kauza ba problema saúde. “Ida ne’e mak funsaun laboratóriu estratéjiku”.

Jornalista: Maria Auxiliadora

Editora: Rita Almeida

HUSIK IDA HATÁN