SERVE Sei Atende Empreza iha Oras Deskansa Meiudia

0
117
Diretór Ezekutivu SERVE, Florêncio Sanches.

DILI, (TATOLI) – Inísiu fulan-jullu, Servisu Rejistrasaun no Verifikasaun Emprezariál (SERVE) sei aplika oras deskansa nian hosi tuku 12:00 to’o 14:00 kontinua halo atendimentu ba setór privadu sira.

Diretór Ezekutivu SERVE, Florêncio Sanches ba TATOLI iha Matadouru, ohin, hatete, tuir Dekretu Lei SERVE nian númeru 7/2017 ne’ebé hatete SERVE hanesan autoridade ida no presiza iha regulamentu orgánika ne’ebé iha artigu dahuluk hatete SERVE loke iha tuku 8:00 dadeer depois kontinua loke fali iha tuku 14:00 to’o 17:00 loraik no iha artigu daruak ne’ebé dehan SERVE bele ajusta ona nia oráriu.

Nune’e iha fulan-jullu 2017 SERVE sei lataka iha loron meiudia nian no sei  loke firma husi tuku 8.00 dadeer to’o 17.00.

“Instituisaun balun sei taka iha 12:00 to’o 14:00 maibé SERVE sei lataka tanba tempu ida ne’e mak ema utiliza mai barak liu iha ne’e tanba balu aproveita oras almosu nian mai SERVE entaun SERVE respeita ida ne’e atu lataka odamatan iha oras ida ne’e”, Florêncio katak.

SERVE daudaun ne’e halo hela planu  hela no hato’o ona karta  ba ministru tanba  tuir lei, ministru tutela tenke aprova no lori ba Konsellu Ministru para tau iha jornál repúblika no bainhira tau ona sei implementa.

SERVE observa katak iha emprezáriu balun hato’o ba SERVE atu buka meiu oinsá labele taka iha oras deskansa nune’e SERVE atu responde ona ezijénsia setór privadu nian.

“Tanba SERVE nia funsionáriu uluk lato’o no taka atendimentu iha oras 11.30 no lamentasaun barak mak mai tanba minutu 30 uza atu halo serbisu maibé taka fali. Agora aumenta ona ema husi na’in-sia sa’e ba 42 tanba ne’e mak hakarak loke ona tanba ita ema barak ona, entaun halo jestaun di’ak liután no tenke loke odamatan husi 8: to’o 17:00”.

Jestaun ne’ebé sei halo mak halo rotasaun ba funsionáriu sira ne’ebé lainklui funsionáriu públiku sira tanba sira-nia lei ketak maibé ba funsionáriu SERVE nian de’it.

“Se ida ne’e mak implementa, ha’u espera katak lamentasaun ne’ebé mai husi ita-nia setór privadu sei menus. Polítika ne’ebé ha’u foti ho razaun ita-nia sosiedade hatete katak ita dependénsia liubá reseita mina Timór, maibé ema lafó opsaun no sira protesta de’it, se pelu menus ita suporta ita-nia setór privadu atu ezerse sira-nia atividade ekonómiku ho di’ak liután no hetan reseita di’ak sei selu taxa di’ak mós”.

Tanba ne’e mak oras rua iha tempu deskansa meiu dia nia importante tebes ba setór privadu sira atubele halo buat ruma iha oras rua ne’e nia laran. (Jornalista : Maria Auxiliadora)

 

HUSIK IDA HATÁN