Sentrál Elétrika Inur Sakato iha kapasidade 17.3 MW

0
51
Sentrál Elétrika Inur Sakato

OEKUSI (TATOLI)-Sentrál Elétrika Inur Sakato iha kapasidade 17.3 Mega Watt (MW) no uza mákina ho tipu 4 x Wartsila 9L34 DF ho velosidade 750 rpm no frekuénsia 50 Hz ho voltajen 1100 volt nomós uza sistema dual fuel ne’ebé mak bele uza Gasoel (LFO) nomós naturál gás.

Asesór Tékniku Rejiaun Autónoma Espesiál Oekusi-Ambeno (RAEAO)-Zona Espesiál Ekonomia Merkadu Timor-Leste (ZEESM), Lino Correia Olocasa informa, konstrusaun ba Sentrál Elétrika Inur Sakato ho montante orsamentu millaun U$31.8.

Gross Energy Production kada fulan 1000 MWh ho Peak load 2 Mega Watt ba rejiaun tomak nomós plant availability porsentu 97.56,” Lino informa ba TATOLI, horsehik.

Konstrusaun ba Sentrál Elétrika ne’e hosi  kompania Wartsila Finland Oy, no hetan supervizaun (konsultan) hosi  kompania ELC & Bonifica SPA no envolve kuaze traballadór 200 durante períodu konstrusaun.

Konstrusaun ne’e hahú iha loron 5 Marsu 2015 to’o Jullu nu’udar prosesu konstrusaun ba baze no fasilidade tomak hodi prepara ba instalasaun ekipamentu vitál hanesan jeradór, transfomadór, ekipamentu control room no seluk tan.

Iha loron 14 Agostu 2015, ró ahi ne’ebé tula ekipamentu ba Sentrál Elétrika hosi  Finlándia diretamente bá Oekusi ho kontentór 100 resin no iha fin Agostu 2015, jeradór haat instala iha fatin tuir dezenu, hafoin kontinua nafatin ho konstrusaun ba estrutura sivíl, mekániku, no servisu instalasaun elétrika ba sistema tomak.

Jeradór dahuluk hahú funsiona iha loron 14 Novembru 2015 no iha loron 25 Novembru rejiaun Oekusi tomak hetan enerjia eletrisidade hosi  Sentrál Elétrika Inur Sakato ho durasaun oras 24 to’o ohin loron.

(Jornalista: Maria Auxiliadora, Editór : Manuel Pinto).

 

HUSIK IDA HATÁN