Senadora Australiana no PR Lú-Olo iha Interese Rezolve Disputa Fronteira Marítima

0
81
Prezidenti Repúblika, Dr. Francico Guterres Lú-Olo entrega prenda ba Senadora Australiana, Penny Wong. Imajen Mídia Palásiu PR.

DILI (TATOLI)—Prezidente Repúblika (PR), Dr. Francisco Guterres Lú-Olo ho Senadora Australiana, Penny Wong, iha interese boot atu rezolve disputa fronteira marítime entre rai rua tanba Timor-Leste ho Austrália iha relasaun ne’ebé di´ak.

Kestaun ne´e fó sai liuhusi vizita kortezia ne´ebé Senadora Autraliana ne´e hala´o ho Xefi Estadu Lú-Olo iha Palásiu Prezidénsia Repúblika, Bairu-Pité, Dili, kuarta horsehik, ne´ebé Ajénsia TATOLI asesu hosi Mídia Palásiu Prezidénsia Repúblika.

Senadora Wong mak Austrália nia Ministra Sombra ba Negósius Estranjeirus no Komérsiu no líder Partidu Opozisaun nian iha Senadu Austrália.

Iha sorumutu ne’e, Senadora Wong informa ba Prezidente Republika katak ema Austrália sira no liu-liu Partidu Traballista Austrália fó prioridade boot ba relasaun bilaterál Austrália nian ho Timor-Leste, no ninia vizita ida ne’e, ne’ebé hala’o iha inísiu lejislatura dadauk ne’e, hanesan prova ida ba importánsia ida ne’e. Senadora Wong mós expresa ninia esperansa atu simu Prezidente Repúblika iha Austrália loron ruma.

Iha biban ne´e, Prezidente Repúblika, Dr. Francisco Guterres Lú-Olo esplika ba Senadora Wong esforsu hotu ne’ebé Estadu Timor-Leste hala’o ona atu hametin unidade, pás no estabilidade nomós dezenvolvimentu nasionál hafoin restaurasaun Independénsia Timor-Leste nian.

Prezidente Repúblika mós informa ba Senadora Wong katak nia simu ona konvite hosi autoridade balu Austrália nian no sei haree tempu atu ba vizita Austrália. Xefi Estadu agradese no kontinua konta ho Austrália nia apoiu ba Timor-Leste nia dezenvolvimentu. (Jornalista: Xisto Freitas)

HUSIK IDA HATÁN