Seidauk Ukun Maibé PR Halo Ona Karidade

0
96
Prezidente Partidu Repúblikanu (PR) João Mariano Saldanha hatais ropa mutin hamrik ho Xefi suku Becora Antinio da Silva.

DILI (TATOLI)—Partido Repúblikano (PR) horseik, Tersa (22/06) lansa kampaña dahuluk ba elisaun periodu 2017-2022 ho asaun karidade  hodi oferese Uma Moris di’ak (UMD) ba povu kbiit la’ek iha Aldeia Bekusi Sentru, Suku Becora, Postu Administrativu Kristu Rei, Munisipiu Dili.

Maske uma ne’ebé PR fó foin mak halo lansamentu fatuk-ain, Xefi suku Becora Antonio da Silva sente agradese tebes ba PR tanba halo ona karidade ba povu kbit la’ek iha suku Becora nia laran.

Prezidente PR João Mariano Saldanha ho xefi suku Becora kahor massa iha lansamentu fatuk-ain UMD, Becussi, Becora

“Agradese ba PR. Maske Partidu ne’e ki’ik, maibé iha fuan boot no hanoin luan hakarak ajuda ema kbiit la’ek sira liuhosi uma moris di’ak,” Antonio realsa hafoin partisipa iha lansamentu fatuk-ain uma moris di’ak ba kbiit la’ek iha Becusi Sentru, horseik.

Asaun hosi PR ba lansamentu fatuk-ain ba uma moris di’ak, tuir xefi suku ne’e, PR hatudu nia komitmentu hodi tulun povu sira sai hosi moris mukit no ki’ak tuir programa polítika prioridade PR nian bainhira ka’er ukun.

“Foin primeira Vez PR hatudu ba povu Timor-Leste tomak katak, PR implementa ona programa ne’ebé PR tau prioridade,” Antonio haktuir.

Lansamentu fatuk-ain ba uma moris di’ak ne’e halo hosi Prezidenti Partidu PR João Mariano Saldanha, PhD akompaña hosi kandidatu no. 2 PR ba Deputadu Luis Alves Tilman “Mauhunu” hamutuk ho estruktura nasionál Partidu PR inklui Xefi Suku, no estruktura Aldeia Becusi Sentru nian.

Mauhunu iha nia intervensaun hatete, entre Partidu hotu ne’ebé mak sei kompete iha elisaun 2017-2022, uniku PR mak seidauk hetan kadeira iha Parlamentu Nasionál maibé ajuda dadauk ona uma moris di’ak ba ema kbiit la’ek.

“PR lakoalia propaganda de’it, maibé PR realiza programa ba realidade hodi hatudu ba povu tomak, tanba ne’e, povu Aileba-oan sira tenki vota ba PR ho Numiru sorteiu 8 iha loron votasaun, 22 Jullu,” eis kandidatu Prezidenti da Repúblika Mauhunu alerta.

No salient katak, bainhira povu aileba-oan sira hili sala iha loron votasaun, lian halerik no mataben hosi povu aileba sei la iha ninin noo rohan, signifika moris nafatin iha mataben nia laran.

Uma Moris Di’ak (UMD) ne’ebé PR lansa ona iha Becussi ho nia medida 6X7 metrus.

(Jornalista : Julia Chatarina, Editór : Manuel Pinto)

 

HUSIK IDA HATÁN