Renan Selak Dezarma Pistóla Husi Ema Sivil

1
1880
Eis-FALINTIL Renan Selak

LOSPALOS (TATOLI)–Eis FALINTIL Renan Selak, iha, Segunda (19/06) dezarma pistóla ida hosi ema sivil iha futumanu fatin, tanba ema ne’e uza pistóla hodi ameasa ema sira iha futumanu fatin, Eis-Kodim Lospalos.

Pistóla ne’ebé Renan Selak hada’u oras ne’e Renan entrega ona ba parte Polísia Nasionál Timor-Leste (PNTL) munisipiu Lautem hodi halo prosesu tuir dalan legál.

Polisia Nasionál Timor-Leste (PNTL) hosi Munisípiu Lautem detein ona ema ne’e hodi evita provokasaun.

“Akontesimentu ne’e akontese tanba ema nain tolu mak provoka malu, uza motór no la uza kapasete hodi ba fatin futu manu no sira hahú halo asaun no komesa hakilar malu no hatudu pistóla hodi ameasa ema, hafoin hadau hosi veteranu Renan Selak no entrega hikas pistóla no autór ba PNTL,” Superintendente PNTL, Munisípiu Lautem, Marcos Sequeira Nunes informa ba Ajénsia TATOLI iha eskuadra polísia Lospalos.

Marcos fó sasin, durante loron hira nia laran ema sira ne’e la’o ho motór ba mai la uza kapasete, bainhira Polísia bolu hodi fó atensaun ema hirak ne’e hanaran án intelijen.

Tuir Komandante Polísia fatin futu manu la’ós fatin atu lori atributu estadu nian tanba lei númeru 5/2017 difini ona kona-bá arma branka, nune’e ema sivíl la lori kualker atributu nasaun no la lori kroat ruma iha fatin públiku sira ne’e krime.

“Lei númeru 5/2017 ema sivíl laiha direitu atu lori fali pistól,” Komandante Marcos esplika.

Hodi dehan PNTL konsidera sivil lori pistóla ne’e nune’e parte PNTL prosesa ona nia relatóriu hodi haruka ba komandu jerál PNTL atu identifika ema ne’e nia identidade, hafoin ne’e aprezenta tuir dalan legál.

Akontesimentu ne’e akontese iha Munisípiu Lautem, Postu Asministrativu Lospalos iha loron 19 lorokraik ho oras 18:45.

To’o notisia ne’e tun parte TATOLI seidauk halo konfirmasaun ba Komando Jerál PNTL.

(Jornalista : Zezito Silva, Editór : Manuel Pinto)

1 COMMENT

HUSIK IDA HATÁN