Promove Relasaun TL-RI, Abio Salsinha Simu Award Hosi Lembaga Prestasi Indonesia-Dunia

0
109
Seremónia simu award iha Hotel Aston, Jakarta. Imajen espesiál.

DILI (TATOLI)—Lembaga Prestasi Indonesia-Dunia (LEPRID) fó rekuñesementu ba artista timoroan, Abio Soares Salsinha iha Hotel Aston, Jakarta, Indonézia, 02 Juñu 2017.

Abio hetan rekuñesementu sertifikadu no award (penghargaan piala) tanba Abio nu´udar sidadaun Timor ba dahuluk ne´ebé espresa ninia talentu arte no múzika iha Indonézia hodi promove amizade entre Timor-Leste (TL) no RI (Repúblika Indonézia).

Iha ninia entrevista ho Ajénsia TATOLI iha segunda ne´e hosi Jakarta, Abio hateten, award ne´ebé nia hetan la´ós ba ninia pesoál maibé ba Timor-Leste no artista timoroan sira.

“Agradese boot ba Aman Maromak liuhusi rai doben ida ne´e ne´ebé bele eskolla ona timoroan ida reprezenta Timor-Leste iha mundu múzika. Ida ne´e hanesan odamatan primeiru ne´ebé nakloke ba artista timoroan sira hotu katak ba futuru labele ha´u mesak maka hetan award ida ne´e maibé artista timoroan sira seluk mós tenki hetan,” nia dehan.

Bainhira simu award refere, Abio la hatais roupa modernu maibé hatais roupa tradisaun Timor. Nia kalaba tais Timor no tara belak iha seremónia simu award ne´e tanba nia ba reprezenta Timor no artista timoroan sira. Iha biban ne´e mós, Abio lansa ninia livru ho títlu “Kamera Cinta”.

Partisipa iha eventu ne´e maka Vise Ministru Solidariedade Sosiál, Minguel Manetelu, Embaixadór TL iha Indonézia, emprezáriu timoroan sira, artista timoroan balun nomós artista no atór filme kuñesidu sira iha Indonézia. (Jornalista: Xisto Freitas)

HUSIK IDA HATÁN