Projetu Mai Munisípiu Konklui iha Timor-Leste

0
98
Embaixadora Estadus Unidus Amerikanu no Ministru MAE ofisialmente enserra projetu Mai Munisipiu.

DILI, (TATOLI)-Projetu Mai Munisípiu (uluk hanaran Ba Distritu) hala’o serimónia hodi konklui atividade sira projetu ninian no enserra projetu hafoin tinan haat iha Timor-Leste (TL).

Atividade ne’e hala’o iha Otel Timór, sesta (16/06) hodi selebra atinjimentu sira husi Konsellu Suku, Sosiedade Sivíl, Autoridade Munisípiu sira, Tribunál sira no Governu.

Projetu ne’e foku liu hodi haforsa partisipasaun komunidade iha prosesu dezenvolvimentu suku no prosesu desentralizasaun, hasa’e asesu ba justisa formál no justisa tradisionál liuhusi formasaun ba konsellu suku iha área dezenvolvimentu organizasaun no justisa, konvoka konsulta públika no divulga informasaun liuhusi parseiru implementadór lokál sira iha nivel suku, postu administrativu no munisípiu.

Projetu ne’e hetan apoiu jenerozu husi povu Amerikanu liuhusi Ajénsia Estadus Unidus ba Dezenvolvimentu Internasionál (USAID) no implementa husi Counterpart International, realiza iha suku 100 iha Autoridade Munisípiu Baukau no Ermera, Administrasaun Munisípiu Kovalima no Likisá, no Autoridade Rejiaun Administrativa Espesiál Oekusi-Ambeno (RAEOA).

Embaixadora Estadus Unidus Amerikanu ba TL, Karen Stanton, hatete projetu ne’e foku hodi suporta Governu TL nia esforsu atu hametin governasaun lokál hodi serví di’ak liután ba povu nia nesesidade.

“Ami espera katak partisipante sira hotu sei kontinua atu harii liután atinjimentu pozitivu sira husi Mai Munisípiu,” Karen dehan.

Durante tinan tolu nia laran, projetu ne’e fornese ona formasaun no apoiu tékniku iha nivel suku kona-ba Lideransa no Komunikasaun, Jestaun Projetu, Asesu ba Justisa no Feto sira-nia Direitu, ba membru konsellu suku liu 500 kona-ba tópiku neen diferente, iha adisionál realiza mós konsulta públika ba membru konsellu suku no organizasaun baze komunidade sira kona-ba ezbosu lei desentralizasaun, no hatama rekomendasaun sira ba Parlamentu Nasionál.

Atu haforsa liután formasaun ne’e, projetu fasilita ona interkámbiu entre suku ho suku sira, fórum sira iha nivel munisípiu no espozisaun ida iha kada munisípiu hodi fasilita konsellu suku sira fahe koñesimentu ba malu.

Projetu ne’e mós apoia ona fundu ki’ik hamutuk 46 ba organizasaun baze komunidade sira hodi implementa atividade sira hanesan enkontru entre komunidade no konsellu suku, atu hasa’e partisipasaun sidadaun iha prosesu planeamentu.

Liuhusi atividade sira ne’e, kresimentu ba koñesimentu iha área dezenvolvimentu organizasaun no dezenvolvimentu kapasidade iha suku 100 aumenta pursentu 52.2 dezde 2014.

Nune’e mós suporta hodi hasa’e asesu ba justisa, projetu nia parseiru organizasaun legál sira fornese ona edukasaun legál ba membru komunidade hamutuk 7,727 (feto 3,416) iha área rurál no remota sira iha munisípiu 5 no fornese asisténsia legál espesífiku ba ema 1,032 (inklui feto 279).

Projetu ne’e mós servisu besik liu ho parseiru legál haat, hodi fornese formasaun regular ba dezenvolvimentu organizasaun no apoiu tékniku ne’ebé hatudu ona kresimentu kapasidade organizasaun aumenta pursentu 43.7.

“Haksolok tebes atu haree rezultadu sira ne’ebé bele atinje bainhira sosiedade sivíl no governu hetan suporta atu servisu hamutuk hodi atinje objetivu komún. Sidadaun TL iha buat barak atu kontribui no kontinua esforsu hodi hametin liután partisipasaun iguál no inkluzivu ba feto no mane, joven no ferik-katuas, no ema ho defisiénsia iha prosesu governasaun ne’ebé sei realiza komunidade ne’ebé forte liu ba ema hotu,” Carolyn Tanner, Xefe Ekipa Counterpart International hatete.

Atu hametin liután asesu ba justisa formál, projetu servisu ona ho Tribunál Baukau no Oekusi hodi instala mapa, kuadru sinál, kuadru avizu sira, fatin tur públiku no kaixa sujestaun hodi asegura katak públiku bele asesu ba tribunál sira ho efetivu, iha adisionál atu fornese formasaun regular ba juíz no ofisiál judisiál sira kona-ba administrasaun tribunál no jestaun dadús ba kazu sira.

Mai Munisípiu servisu ona ho Komisaun Nasionál ba Eleisaun (CNE) no Sekretariadu Tékniku ba Administrasaun Eleitorál (STAE), iha adisionál servisu mós ho organizasaun sira ne’ebé reprezenta feto, joven no ema ho defisiénsia, durante eleisaun Suku 2016 ba votante tárjetu sira no kampaña edukasaun sívika hodi asegura eleisaun ne’ebé inkluzivu.

Projetu ne’e nia parseiru sira dezenvolve ona matéria divulgasaun oioin inklui teatru komunitáriu, talkshow, filme badak, Servisu Anúnsiu Públiku iha rádiu, televizaun, no poster sira ne’ebé mak hetan aprovasaun husi CNE no STAE, dezeña atu eduka públiku kona-ba Lei Suku Nú.9/2016, enkoraja no halo advokasia ba partisipasaun grupu vulneravel sira.

Maske ho tempu ne’ebé badak ba divulgasaun informasaun kona-ba lei ne’e, hatudu taxa partisipasaun votante kuaze liu pursentu 70 iha eleisaun suku primeira volta.

(Jornalista: Maria Auxiliadora, Editór : Manuel Pinto)

HUSIK IDA HATÁN